Ezinegona Donibane Lohizuneko mediatekan

Lan jazarpen kasu batek Donibane Lohizuneko mediatekako giroa guztiz nahastu du. Susmopean, afera argitu arte bost langile prebentzioz “kanporatu” dituzte, haiek akusazioak ukatzen dituzten bitartean.

Kazeta|2019/01/11 13:52|0 iruzkin
Capture_d_e_cran_2019-01-09_a_12
Donibane Lohizuneko mediatekako bost langile azaroaren 16tik daude lanetik kanpo.

Donibane Lohizuneko mediatekako hamabost langiletik bost beren zereginetan geldiarazi zituzten joan den azaroan. Lan jazarpenagatik susmopean dira, baina diziplina prozesua bukatu arte hilabeteko saria jasotzen segituko dute.

Langile hauek leporatzen zaiena ukatzen dute. Beren abokatua den Anne-Marie Mendibourek eman ditu azalpenak: “nire bezeroak azaroaren 16tik daude lanetik kanpo. Auzapeza barne zen Herri Kontseiluko bost ordezkariren aitzinera izan ziren deituak eta haien bulegoak uzteko galdegin zitzaien”. Bere hitzetan, bost langileei ez zitzaien delibero horren arrazoirik eman. Lanean izandako sufrimendu arazo bati egin omen zitzaion soilik erreferentzia. Dirudienez, irailetik landa arrisku psikosozialei buruzko auditoria bat egiten ari zen langile guzien artean eta Mendibourek dio bere bezeroek lanean jasaten duten sufrimenduaren berri eman zutela.

“Egoerarekin traumatizaturik”

Abokatuaren erranetan, bost langileak traumatizaturik dira. Kanporatzea jakin eta bi astera, arrisku psikosozialetako aditu batek txosten bat egin zuen eta haien kanporatzea eskatu. “Publikoki agertu nahi izan dugu, Herriko Etxeak maila handiko jazarpen morala aipatuz hori bera egin duelako”. Bost langileak publikoki azaldu dira leporatzen zaiena ukatzeko. Mendibourek oroitarazi du ustez errugabeak direla egun eta erabili den prozedura bortitza deitoratu du.

Susmopean diren bost langileak gutienez bi pertsonari jazarpena egiteagatik kanporatu dituzte. Prozedura administratiboa ideki zaie eta gisa berean, prozedura penal bati buru egin beharko diote. Samuel Vuelta Simon prokuradoreak baieztatu du Donibane Lohizuneko auzapezak seinalamendu bat aurkeztu duela. Bere arabera, inguru profesionalean prozedura bikoitz hauek ohikoak izaten dira eta ildo horretan poliziak inkesta bat ideki duela jakinarazi du.

Inkesta abian eta deliberoen zain

Dirudienez, Donibane Lohizunekoa hainbat urtez iraun duen arazo bat litzateke. Abenduaren hondarrean CFDT sindikatuko ordezkariek haien arduradunei abisua ematea deliberatu zuten. Jean-François Irigoyen auzapezak gaian espezializaturiko kabinete bati eman zion jazarpen susmoak egiaztatzeko ardura. Langile guziak galdekatu zituen psikologoaren arabera “maila handiko jazarpen morala gertatu ahal izan da”. Gaitzesgarri izaten ahal diren hainbat posta elektroniko eta marrazkik bere erranak indartuko lituzkete.

Orain, sindikatuek, langileen ordezkariek eta hautetsiek erabaki azkar bat itxoiten dute, gisa horretan lasaitasun eta normaltasun egoerara itzultzeko. Prozedura administratiboa apirilean bukatu beharko litzateke, diziplina kontseilu batek bost langileei buruzko erabakia hartuko duelarik. Oharpen bat, beren funtzioetatik behin-behineko kanporatzea, lan mailaz jaustea edo behin betiko kanporatzea izan daitezke jaso ditzaketen zigorrak. Arlo penalean berriz, inkestak delitua egon ahal dela erakutsiko balu, posible litzateke langile hauek auzitegietara joan behar izatea. Gerta liteke halako delituengatik bi urteko espetxe zigorra eta 30.000 euroko isuna jasotzea.