Sara Majarenas
Preso ohia

Beren amarekin kartzelan dauden haurrek hiru urte betetzean pairatutako bereizketa azaltzeko xedea du "Maritxipi eta Amatxo" ipuinak. Sara Majarenasek bere alabari, Izarri, idatzitako kontakizuna Mikel Orbegozo presoari bidali zion eta honek maitasun hitzak marrazkitan islatu zituen. Majarenasek idatzi eta, Joxemari Carrerek forma eman dio istorioari.

“Irudimena eta irria dugun bitartean ez gara inoiz preso egongo”
Iurre BIDEGAIN|2019/01/08 06:40|0 iruzkin
Majarenas
Oihana Mujika, Mikel Orbegozoren ama, Sara Majarenas eta Joxemari Carrere, liburuaren aurkezpenean. (Jon URBE/FOKU)

Kartzelak erraztasunak baino oztopoak jartzen ditu ahal dituen zirrikitu guztietan eta gutunak horietako bat dira

Askok zoriondu gaituzte sentitzen zutelako hutsune bat zegoela zentzu horretan

Zein da "Maritxiki eta Amatxo" proiektuaren jatorria? 



Sara Majarenas: Preso nengoenean ama izan nintzen. Ama guztiek daukagu data bat buruan. Hots, umeak hiru urte betetzean espetxetik ateratzen da eta ama barruan gelditzen da. Nola esplikatu ume bati bere ama dagoen tokia utzi behar duela? Nik ipuin hori asmatu nuen tresna bezala Izarrekin landu ahal izateko ama eta bere arteko bereizketa.

Nire lagunak, Mikel Orbegozok, aurretik ere espetxeari buruzko marrazkiak egin izan zituenez, berari korreoz bidali nion eta oztopo guztiak gaindituz marrazki horiek egin zizkidan. Izarrekin gertatu ziren gauzak gertatuta [Izarren aita bere alaba hiltzen saiatu zen] ez nuen ipuin hori erabili. Orain kalean egonda bururatu zait argitaratzea beste umeei eta amei tresna hori eskaintzeko eta baita kalean problematika hori gizarteratzeko ere.



Ipuin zein marrazkien bidalketa nola iragan zen?

Kartzelak erraztasunak baino oztopoak jartzen ditu ahal dituen zirrikitu guztietan eta gutunak horietako bat dira. Kartzelen arteko bidalketa zerbitzutik pasa behar da, bi aldiz, egitura batetik bestera igarotzean. Bi hilabete pasatzen dira gutuna beste espetxera iristen denera arte. Beti ere galtzeko arriskuarekin. Ausardiaz jokatu behar da. Gure kasuan ondo atera zen. 



Preso dauden ama eta umeen arteko bereizketa azaltzeko tresna bat dela diozu. Izarren kasuan baliagarria izan zitzaizun?

Nire kasuan ez zen banaketa hori eman. Gertatu ziren gertakariak eta gero, azken urte hori elkarrekin pasa genuen Alcobendaseko pisu horretan. Hori dela eta, ez nuen erabili. Gaur egun argitaratu dugunean eta kontatu diodanean, berak segituan esan dit: 'ama hau ez da Maritxipi, hau ni naiz'. Berak oso argi dauka bere istorioa hori dela. Ulertzen du, eta gustuko du ipuina.

Preso daudenei ipuina helarazi diezue?

Oraindik preso dauden umeak daude. Beraiei bidaltzea gure lehentasunetako bat da eta horretan ari gara.



Nolako harrera izan du?

Erran didatenez, beste umeak ere oso identifikatuak sentitu dira. Ume eta gurasoen arteko gauza batzuk konpartitzen ditugu, hala nola, ilargiari begira amatxo eta aitatxo preso daudela nola gogoratzen ahal giren. Hori nire ustez denok erabili dugu.

Harrituta geratu naiz. Askok zoriondu gaituzte sentitzen zutelako hutsune bat zegoela zentzu horretan. Jarraituko du hutsunea egoten, ziurrenik. Lan asko dago egiteko gai honen inguruan, baina behintzat bidea irekitzen du umeei kartzela zer den esplikatzeko. Hori sentitu eta azaleratu didate beste amek. 



Ipuinaren esaldi bat azpimarratuko nuke: "Ez dago munduan harresirik irudimena eta maitasuna giltzapetuko duenik". Zein da esaldi honen esanahia?

Nahiz eta preso egon, irudimena eta irria dugun bitartean ez gara inoiz preso egongo, benetan. Ez gaituzte barruan edukiko, gu beti kanpokoak izango baikara, nahiz eta barruan egon.



Badira hilabete batzuk Izar eta zu aske zaudetela. Nola pasa da birgizarteratzeko prozesua?

Oso azkarra. Kriston abiadura darama biziak. Hor gaude, abiadura hori harrapatzen saiatzen.



Izarrek nola pasa du?

Egokitzen ari da. Aldaketa asko bizi izan ditu bere bizitzako lau urte hauetan. Garai hau bizi izan duen goxoena da. Euskal Herriko lagun, senide zein ikastolaren laguntzaz, dena askoz ere errazago eta goxoago da. 



'Motxiladun umeek' bizi duten egoeraren konponketa Baiona eta Bilbon urtarrilaren 12an antolatu dituzten manifestazioen aldarrikapenen artean presente egongo da, besteak beste. Zein da Bagoaz eta Sarek antolatutako manifestazioen garrantzia zure iritziz?

Argi eta garbi pausu hau eman behar da. Presoen aferak konponbide bat behar du, lehenbailehen. Batez ere bizikidetzan pausu bat eman behar da, alde batek sufrimenduak segitzen duelako. Egoera korapilatuta dago oraindik eta ezin dugu gehiago luzatu. Ezin dugu ume, senide eta presoen sufrimendua areagotu.