Kazeta

Euskal selekzioaren ofizialtasuna lortzeko eskaera formala

Euskadiko Futbol Federakundeak abenduaren 12an egindako Batzar Orokorrean euskal selekzioaren ofizialtasuna lortzeko urrats garrantzitsua egin du. Aldeko 43 bozkekin eta abstentzio batekin UEFA eta FIFAn sartzeko eskaera formala egitea deliberatu du.

Euskal Selekzioaren hasierako hamaikakoa.  (Endika PORTILLO/FOKU)
Euskal Selekzioaren hasierako hamaikakoa. (Endika PORTILLO/FOKU)

Durangon egindako Batzar Orokorrean urte luzez eskatu zaion urratsa egin du Euskadiko Futbol Federakuntzak (EFF). Aldeko 43 bozkekin, kontrakorik gabe eta abstentzio batekin, batzarrak “EFF UEFA eta FIFAn sartzeko eskaera formala egitea” erabaki du. Bozketa sekretua eta nominala izan zen. Errealak eta Athleticek ere aldeko bozka eman zuten. Eibar eta Alaves taldeek berriz, ez zuten parte hartu.

Batzarrean ohikoa baino partaidetza handiagoa izan zen. Hainbat euskal jokalari ere izan ziren, horien artean Asier Illarramendi eta David Zurutuza (Erreala), Asier Riesgo (Eibar), Manu Garcia (Alaves) eta Ainhoa Tirapu (Athletic). Zurigorrien ikur nagusietakoa den Jose Angel Iribar eta Eusko Jaurlaritzaren kirol zuzendari Jon Redondok ere ez zuten hitzordu garrantzitsu horretan hutsik egin nahi izan.

Euskal selekzioaren ofizialtasunaren alde lanean ari diren eragileek pozik hartu zuten EFFren Batzar Orokorraren deliberoa. Kike Zurutuza Euskal Herria Kirolaren kideak “urrats handia egin dela” adierazi zuen. “Egia da erabaki hau berant heldu dela. Jokalari eta zaletuek galdegin izan duten gisan, halakorik duela 15 urte egin izan balitz, egun beste egoera batean egongo ginateke. Baina Euskal Herria Kirola praktikoa eta baikorra da eta hori dela eta, gaur lortu denari merezi duen balorea eman nahi diogu”, nabarmendu zuen Zurutuzak.   

Orain galderaz beteriko egoera ideki da. Espainiako Federazioak, UEFAk eta FIFAk beren iritzia agertu beharko dute. Borroka juridikoa eta eztabaida publikoa aurreikusgarriak dira eta jendartearen aitzinean eragile bakoitzak bere argudioak eman beharko ditu.