Ziburun kasu egin umorearekin

Batzuentzat Ziburun ez da irri egiterik. Azaroaren 22an, Daniel Arbisa ziburutarrak difamazio akusaziopean Baionako zigor auzitegiaren zitazio bat jaso zuen. Egindako ustezko delitua: La Gazette de la Nivellen argitaraturiko elkarrizketa batean auzapezaren eta hirigintza hautetsiaren ohorea kaltetu izana.

Kazeta|2018/11/28 06:55|0 iruzkin
Ziburu
Heldu den urtarrialean izanen da Daniel Arbisaren kontrako auzia.

Ziburun umorearekin kasu egin behar dela dirudi. Daniel Arbisa herritarrak horixe bera ordain dezake. La Gazette de la Nivelle kazetan argitaraturiko fikziozko elkarrizketaren egileak Guy Poulou auzapeza eta Jean-Jacques Gouaillardet hirigintza hautetsia haserrarazi baititu. Hainbesterako, non Arbisak heldu den urtarrilean Baionako zigor auzitegira joan beharko duen bere burua eta finean, adierazpen askatasuna defendatzera.

Idatzitako artikuluak umoretsua eta ezohikoa izan nahi zuen. Elkarrizketa Ziburuko hirigintza auzapezordeari egin zitzaion, teilaturik gabeko etxean eta eraikitzeko baimenik gabe. Fikziozko elkarrizketa irudimenezko ideiekin abiatzen zen eta hautetsiak ez zituen galderak ulertzen. Ondorioz, zentzugabea eta irrigarria den testua osatu zuen Arbisak.

“Helburua irri egitea zen, eraso, min egin edo difamatzeko asmorik gabe”, adierazi du artikuluaren egileak. “Nire artikulua karikatura bat da. Guziari buruz irri egiten ahal genuela uste nuen, baina badirudi guziekin ezin dela halakorik egin”, deitoratu du. Daniel Arbisa harriturik da, “baina ez guztiz, pertsonaia hauek ezagutzen ditugunez...”

“Mugak gainditu dira”

Poulouk eta Gouaillardetek ez dute berdin ikusten eta kexa aurkeztu dute. Azken honek egin beharrekoa egin dutela adierazi du. “Daniel Arbisak pertsonen ohore eta zintzotasunari zuzenean eragiten dioten gezurrak erran ditu. Parodia gainditzen den mementoan, difamaziorantz joaten gara”.

Hirigintza hautetsiak berearekin jarraitzen du: “Mugak gainditu dira, bereziki kritika asmatua delako. Bukatu gabeko eraikuntza bati egiten zaio kritika. Zalantzan jarri ezin den gai bati buruz elkarrizketa faltsu bat egiten denean, pertsonaren kontrako eraso zuzena gertatzen da”, erantsi du. Hortaz, badirudi herriko etxearen erabakiez noiz irri egiten ahal den eta noiz ez berak erabaki dezakeela.

Edozein gisaz, Baionako auzitegiak erabaki beharko du adierazpen askatasunaren mugak gainditu diren eta pertsona batzuen duintasuna kaltetu den ala ez. Afera irri egiteko modukoa litzateke, askatasunen murrizketa gai hain serioa ez balitz.