Kronika
 
Politikaren judizializazioaz

IRITZIA- Ahate sanoak hiltzeko agindua bete ez zuten laborarien kontrako auzia Pauen iragan zen azaroaren 5ean. Egoitz Urrutikoetxeak auziari buruz hausnartu du Eleka txokoan.

Egoitz URRUTIKOETXEA|2018/11/19 14:05|0 iruzkin
Egoitz_urrutikoetxea
Egoitz Urrutikoetxea

Azaroaren 4an, Barkoxeko Uhartia etxaldeko laboraria eta ELB sindikatuko bozeramailea Pabeko auzitegira deituak ziren, 2017ko hegazti gripearen krisi denboran ahate sanoen prebentziozko erhaitea oztopatzeagatik.

Lehen irakurketa azkar batek, bi laborantza ereduen arteko talka azaleratzen du: alde batetik, ingurumenaren zaintzaz eta herritarren elikadura sanoaz axolatzen den lekuko laborantza iraunkorra; eta bestetik, finantzaren eta merkatuaren irizpideei men egiten dien laborantza industriala.

Argi gelditu da Ipar Euskal Herriko jendarteak lekuko laborantza iraunkorrarekiko duen atxikimendu azkarra, eta laborantza ildo hortan ari direnekiko konfiantza. Hor dugu, hain segur ere, azken urteetako borroken eta pedagogia lanaren emaitza.

Auziaren azterketa pausatuago batek aldiz, Estatuaren eta orohar sistemaren orekak argiratzen ditu. Prokuradorearen hitzei erreparatzen badiegu, legearen aplikazio hertsia oztopatu duten laborari eta sindikalisten ausarkeria da auzitan dena. Estatuari ezin onartuzkoa zaio Errepublikaren legeak betetzen ez dituzten eremuak egotea. Hots, erabakiak lurralde osoan berdin ezarri behar dira azken hauek zentzugabeak izanik ere. Eta sistemaren oreka hautsi dutenek zigor bortitza behar dute, etsenplu gisa, beste inork ber bidea har ez dezan.

Estatuak herritarren borondatezko menekotasuna behar du bizirauteko. Hargatik, demokrazia liberalaren iruditerian, demokrazia legearen aplikazio hertsiarekin hasi eta bukatzen da. Haatik, nork ditu legeak egiten eta noren interesen zerbitzuko?

Ahateen krisiak agerian utzi du legeak laborantza industrialaren zerbitzura egiten dituztela. Eta ez da salbuespen bat. Izan ere, gutxi batzuen interesak bermatzen dituen sistema baten petzero gira. Mihian bilorik gabe, demokraziaren pribatizazioa gertatzen ari dela baiezta dezakegu, legelariek finantza munduaren eta merkatuaren beharrei erantzuten baitiete oroz bat, herritarrei bizkarra emanez.

Politikaren judizializazioaren garaiak dira. Estatu administrazioa legean eta justizian gotortzen ari da. Hortaz, auziperatua izan den ELB-ko bozeramailearen gogoetei jarraikiz, erresistentzia eta desobedientziaren deiadarra jotzea dagokigu!