“Etxea”, euskararen alde subjektiboa erakutsi nahi duen dokumentala

Azaroaren 16an Ipar Euskal Herriko euskaldunen errealitatea erakutsi nahi duen “Etxea” dokumentala estreinatuko da Azkaineko gaztetxean. Hainbat azkaindarren bizipenak biltzen dituen filma bertako herritar talde batek egin du.

Kazeta|2018/11/16 14:10|0 iruzkin
Loading player...

Euskaraldiaren dinamikaren baitan, Azkaineko herritar talde batek bertako euskaldunen lekukotasunak biltzen dituen dokumentala osatu du. “Etxea” du izenburua eta heldu den azaroaren 16an ikusi ahalko da lehenengoz, arratsaldeko 19.30ean Azkaineko Kilika gaztetxean.

Egileek adierazi dutenez, “filma gogo batetik sortu zen: euskararen bizipen pertsonalak agerraraztea. Gutitan aztertu dira euskararen alde subjektiboa, emozioak, beldurrak.” Xede horrekin, jendea bihurtu nahi izan dute protagonista eta ezaugarri ezberdineko herritarrak elkarrizketatu dituzte.

Dokumentala ez da euskararen inguruko proposamenak egiteko tresna bat, “errealitatea agertzea, begirada ezberdin bat eskaintzea eta Ipar Euskal Herrian euskarak dituen oztopo ainitzen gainetik irauten duela eta bizirik dela erakustea baizik”, nabarmendu dute.

“Etxea” egin duten azkaindarrek euskararen inguruan galdera berriak sortzea bilatzen dute. Haien ustez, erakusten den errealitatea Ipar Euskal Herriko edozein herritako bizipen izaten ahal da eta hori dela eta, ez dute baztertzen herri gehiagotan erakustea.