Itsasuko herria biziarazten segitzeko prest

Hogeita hamargarren urtebetetzea ospatuko du urriaren 27an Itsasuko Goxoki Gaztetxeak. Ibilbide honetan egindakoari eutsi eta gazte gehiago animatu nahi ditu etorkizunari begira.

Iurre BIDEGAIN|2018/10/26 14:00|0 iruzkin
Goxoki_gaztetxe_itsasu_03_1_
Hogeigarren urtebetetzearen prestakuntza Goxoki Gaztetxean. ©Gaizka Iroz

Hogeita hamar urtez egindako lanari esker, herriko aktorea izatea lortu du Itsasuko Goxoki Gaztetxeak. Ibilbide luze hau ospatuko dute bere kideek urriaren 27an prestatu duten ekimenean. Eguerdiko bazkariaz gain, gustu guziak asetuko dituzten kontzertuak antolatu dituzte.

Gibelera begira jarri da Amaia Hiribarren Goxoki Gaztetxeko ko-lehendakaria. Nahiz eta berak gaztetxearen abiatzea ezagutu ez, bere memorian dirau garai horretako testuinguruak. Oroitzen duenez, 1988an Lapurdiko herrian gertatutako atxiloketen harira, gazte talde bat elkartzen hasi zen. Hego Euskal Herrian ere gaztetxeen mugimendua pizten hasi zen eta horrek ere gazte itsasuarrak motibatu zituen.

Musika taldeentzat leku bat eskaintzeko nahiaz, Herriko Etxearengana joan ziren gazteak eta honek lokal bat eskaini zien. Gaur egun bertan segitzen dute gazteek, Herriko Etxearekin duten harreman "onaren" seinale. Hain zuzen, hitzarmen bat izenpetuta dute urtean sei gaualdi egiteko baimena ukaiteko.

Herriko Etxeaz gain, besta komitearekin ere harremana sendotzea lortu dute gazteek. "Bestak elkarrekin antolatzen ditugu. Ildo horretatik, herrian zehar eraso sexisten kontrako pankartak jarri ditugu", azaldu du Hiribarrenek. Gisa berean, herriko elkarte batzuekin ere lankidetzan ari dira, hala nola, Hiru kasko elkartea, ikastola eta gau eskolarekin.

Parte hartzea indartu

Urte luze hauetan aurre egindako oztopoei dagokienez, gazteen parte hartzea azpimarratu du Hiribarrenek. "Gaur egun kide gutxi gara eta ez da erraz gaztetxea biziaraztea. Orotara, aktibo garenok 6-7 gara", erantsi du. Geroari begira gazte gehiago animatzea nahi dute eta parte hartzea emendatzeko hausnarketa landuko dutela dio.

Halaber, heldu diren urteei begira ere inguruko gaztetxeekin lankidetzan aritu nahi dute. Elkarlanaren hasiera hori islatuko da larunbateko ekimenean, Kanbo, Sara, Ezpeleta eta Luhusoko gaztetxeek beren laguntza eskainiko baitute.

Larunbateko ekimena 12.00etan abiatuko da Gau eskola eta ikastolak antolatuko duten bazkariarekin. Ondotik, 18.00etatik aitzina, hainbat talde igoko dira oholtzara: Klik-k, Asto Baba, Diabolo Kiwi, Kiki&The Red Kiketz, Sorotan Babies, Fizt and Furiuz eta Kevin Jager.