Junes Casenave pastoral egilea zendu da

Apez eta idazle xiberotarra hil berri da, 94 urterekin. Betharramen eginen diote azken agurra.

KAZETA|2018/09/24 13:45|0 iruzkin
Junes2
Junes Casenavek 2010ean utzi zuen Basabürüko parropia.

Betharramen zendu da Santagraziko semea joan den gauean, 94 urte zituela. Haren ehorzketak irailaren 26an, asteazkenean, arratsaldeko 3ak eta erditan izanen dira, Lourdes ondoan den herri horretan berean.

Junes Casenavek pastoral sorta ederra utzi du. Horietako 12 taularatuak izan dira, baina beste anitz paper gainean gelditu dira. Zehaztasuna eta zorroztasuna ekarri ditu Xiberoko trajedien arloan, bai historiari dagokionez, bai euskarari, baita bertsogintzari dagokionez ere. "Aitzinetik lejenda bat bezala zen pastorala eta, nik, historia sartu dut. Eta nahi izan dut euskara ederra izan dadin eta ber denboran jendeek entelegatzen duena", adierazi zuen 2010ean Le Journal du Pays Basque-i eskaini zion elkarrizketa batean.

"Santa Grazi" (1976) izan zen bere lehen pastorala. Ondoren, plazaratu zituen "Ibañeta", "Zumalakarregi", "Santa Kruz" eta "Agote". "Santa Engrazi" eta "Eñaut Elizagarai" izan ziren antzeztuak izan diren bere azken bi obrak.

Ohorezko Euskaltzain zenak olerkiak nahiz ipuinak ere idatzi zituen eta hiztegigintzan lanean aritu zen. Sendabelarrak ongi ezagutzen zituen eta kirola bere egunerokotasunean sartua zen.

1981ean itzuli zen Xiberora eta han gelditu zen Elizarentzat lanean, 2010a arte.