Iurre BIDEGAIN

Greba mugimenduari eusteko prest daude tren gidariak

SNCFek tren bat kontrolatzailerik gabe abiatu nahiko duen aldi oro, greba bat antolatuko dutela iragarri dute gidariek. Horretarako, “iraupen luzeko greba abisua” aurkeztu dute. Ekintzak prestatzeaz gain, informazioa banatzen segitzen dute beren desadostasuna adierazteko xedez.

"Iraupen luzeko greba" abisuak urte bukaera arte balio du. ©Isabelle Miquelestorena
"Iraupen luzeko greba" abisuak urte bukaera arte balio du. ©Isabelle Miquelestorena

Beste behin ere, SNCFen erabakiaren kontra mobilizatzeko prest daude tren gidariak. Hain zuzen ere, enpresak trenak kontrolatzailerik gabe martxan jartzeko asmoa du. Hots, gidaria soilik bidaiaz arduratuko litzateke. CGT sindikatuak zuzendaritzaren erabakiak segurtasuna arriskuan ezartzeaz gain, lanpostuak ere mehatxatzen dituela dio.

SNCF aldi bakar batez entseatu da tren bat abiatzen kontrolatzailerik gabe eta langileek segidan erantzun zioten erabakiari. Hain zuzen, irailaren 18an greba mugimendu bat burutu zuten. Egunean antolatutako biltzarrean mobilizazioei segida ematea erabaki zuten. Etorkizunerako duten asmoa argi utzi du Peio Dufau CGTko tren gidariak: "tren bat kontrolatzailerik gabe ibilaraziko duten aldi oro, greba mugimendua antolatuko dugu ondotik".

Tren gidariek "iraupen luzeko greba abisua" aurkeztu dute. Horri esker, bi egun lehenago abisatuz gero, edozein mementoan greba egiteko eskubidea dute. Abisu horrek urte bukaera arte balio duela aipatu du sindikalistak. Dufauren erranetan, gidariek "arrisku bat dagoela" kontsideratuz gero, trena gidatzea errefusa dezakete. "Dugun eskubide bat da. Guk kontsideratzen dugu kontrolatzailerik gabe ibiltarien segurtasuna ez dela ziurtatua", erran du.

Egun hauetan tren gidariek informazioa banatu diete erabiltzaileei. Horrez gain, desadostasuna eta haserrea adierazteko helburuz, pintxak eta eskumuturrak eginen dituztela aipatu du Peio Dufauk.