Aurten ez da Lapurtarren Biltzarra ospatuko

38. edizioa izan behar zuen aurtengoak, baina Lapurtarren Biltzarraren antolatzaileek, azken urtetako gainbehera ikusirik, geldialdi bat egitea erabaki dute, geroari buruz gogoeta baten abiatzeko.

Kazeta|2018/08/27 07:28|0 iruzkin
Guz_lapurtarren_biltzarra2016_antzerkia_ustaritze_imiquelestorena04
Lapurtarren Biltzarra Uztaritzen ospatu ohi zen. ©Isabelle Miquelestorena

1979. urtean hasi ziren lehenengoz Lapurtarren Biltzarra ospatzen Uztaritzen. Lapurdiren eta oro har Euskal Herriaren historian Biltzar horrek izan zuen garrantziaren oroitzapenetik abiatuz, hitzordu horrek euskal kultura eta identitatea sustatzea eta aldarrikatzea izan du ardatz nagusitzat.

Alta, antolatzaileek erabaki dute aurten aldarrikapen eta besta egun hori ez dela eginen. Jada 2014. urtean gogoeta bat burutu zuten, ekitaldiaren arrakastaren apaltzeaz arranguraturik, eta garai hartan formula berriak proposatu zituzten, berrikuntzak ekarriz animazio, karro, desfile, antolakuntza eta komunikazioan. Berrikuntza hauek hastapenean harrera ona izan zuten arren, ez zen bilatzen zen aldaketarik lortu.

Antolaketan aritu izan den taldeak antolakuntzaren atal horretan berrikuntzarik ez dela izan nabarmendu du, bere akidura agertzearekin batera. “Taldea ez da berritu azken urteetan. Lapurtarren Biltzarrak hats berri bat behar du, jende gazte gehiago, jarraitu ahal izateko” berretsi du 15 urtez egun honen prestaketan aritu izan den Antton Lannesek.

Arrazoi horregatik eta azken urteetan publikoaren parte hartzea apaldu dela kontuan hartuta, aurtengo edizioa bertan behera utzi eta gogoeta fase bati ekitea erabaki dute. Gogoeta hori jende guztiari irekia da eta finean, antolakuntza taldea nahiz egunaren mamia eraberritzea bilatuko dute.

Seguruenik jende ainitzen artean arrangura sortuko du urtero urrian markatua izan den hitzordua ez ospatzea. 1979. urtean hasi zenetik, aurten bigarrenez gertatuko da hori.