EH Bairen aburuz, G7 gailurra "sistema kapitalista eta multinazionalen ordena zaintzeko" xedea duen "munduko elite" eta "klase dominanteen" bilgunea da. Biarritzen 2019ko abuztuan iraganen den ekimenaren karietara, Euskal Herriko ospea defenditzen ahaleginduko dela erran du.
Michel Veunac Biarritzeko auzapezak plazaratutako poza deitoratu du EH Baik. "Biarritzek bil lezakeen famaz soilik axolatzeak ikuspegi hertsi, motz eta egoista erakusten du. Lotsagarria iruditzen zaio EH Bairi".
Mugimendu abertzalearen erranetan, G7 gailurra hitzordu garrantzitsu bat izanen da "Estatu nagusien politikak salatzeko, berehalako neurriak exijitzeko, kapitalismotik haratago doazen beste logika zein alternatibak aldarrikatzeko eta herrien autodeterminazio eskubidea defenditzeko".
Nahiz eta oraingoz ez dituen mobilizazioaren formak zehaztu, ekimen horiek "masibo bezain herrikoak izatera" deitu du.