Euskal Herriaren askatasuna aldarrikatzen duen plataforma

Berriki egituratutako Euskal Herriak Askatasuna plataformak Euskal Herriaren "zanpaketa mahaigaineratu" nahi du. Horretarako, bere lehen ekintza otsailaren 24an antolatu zuen, Baionan, eta bide batez, Korsikari elkartasuna adierazi zion.

Kazeta|2018/02/26 17:10|0 iruzkin
Guz_euskal_herriak_askatasuna_plataformaren_elkarretaratzea_8456
Euskal Herriak Askatasuna Baionan antolatutako elkarretaratzea. © Aurore Lucas

Euskal Herriak Askatasuna plataformaren aburuz, "nazio zanpaketaren arazoari" aurre egiteko, Euskal Errepublika eraiki behar da. Independentziaren aldarria hauspotzeko xedez, lehen ekimen bat antolatu zuen. Elkarretaratzea otsailaren 24en iragan zen, Baionako herriko etxearen aitzinean.

Euskal Herriak Askatasuna plataforma otsaila hasieran egituratzen hasi zela azaldu du Eneko Zestauk. "Abertzaleak diren norbanakoek" osatzen duten talde horrek Euskal Herriak memento garrantzitsu bat bizitzen duela uste du. Euskal Autonomia Elkargoan Gernikako Estatutua eztabaidatzen den unea eta Korsikan bizi den egoerari aipu egin die, hain zuzen.

Gatazka politikoaren konponketari begira, korsikar indarrek oinarrizko aldarrikapenak entzunarazi dituztela nabarmendu du Euskal Herriak Askatasuna taldeak. Hala nola, korsikeraren ofizialtasuna, preso eta iheslarien amnistia eta nazio izaeraren aitortza.

"Aldarriak mahai azpian"

Euskal Herriari dagokionez, aldiz, "nazio askapenerako borroka itzaltzeko bidean" dagoela pentsatzen du. Plataforma ez dator bat indar abertzale nagusiek duten jarrerarekin. "Abertzale deitzen diren eragile nagusienek gatazkaren arrazoi politikoekin loturiko aldarriak mahai azpian gordetu" dituztela iruditzen zaio erakundeari.

"Parisek nahi duen bide sasi-teknikoan murgildu dira erabat. Ez dute ez euskararen ofizialtasuna, ez amnistia eta ez Euskal Herriaren nazio aitortza konponbiderako gako gisa planteatu. Alderantziz, frantziar inperialismoaren ordezkari lokalak bidelaguntzat hartuta, frantziar estatuaren jarrera zuritu eta txalotzen dute, eredugarri bailitzan".