Ttinka, Baxe Nafarroako lehen haurtzaindegi euskalduna

2019. urtearen hasieran ateak irekiko dituen Ttinka haurtzaindegiaren egitasmoa aurkeztu dute Lakarran urtarrilaren 16an. Baxe Nafarroan murgiltze sistema plantan emanen duen lehen zerbitzua izanen da.

Iurre BIDEGAIN|2018/01/16 15:05
Img_6327
Ttinka haurtzaindegiaren obrak 2017ko urrian abiatu zituzten. ©Iurre Bidegain

"Apezetxe" deituriko egoitzari buruzko gogoeta faseari eutsi zioten Gamarte eta Lakarrako herriek 2001ean. Bertan etxebizitzak egiteaz gain, haur kopurua kontutan harturik eta herritarren beharrak gidaturik, haurtzaindegi bat sortzeko ideia ukan zuten. Asmoa bai, baina egoitzarik ez zuen Baigorriko Mendikoakoa elkartearekin harremanetan ezarri eta elkarlanean euskaraz osorik izanen den haurtzaindegia irekiko dute 2019an: Ttinka.

"Mikro-haurtzaindegi" bat izanen dela azaldu du Jean Michel Bicain Gamarteko auzapezak. Hau da, hamar haur inguru errezibituko ditu. Hamar aste eta sei urte bitarteko gazteei harrera eginen diete langileek. Hain zuzen ere, hiru lanpostu eta erdi sortuko dituzte Ttinka haurtzaindegirako.

Leire Bidart Ttinka elkarteko kidearen erranetan, haurtzaindegia burasoen beharretara egokituko da. Bai, ordutegiarekiko baita kostuarekiko ere. Burasoei ordutegi zabala eskainiko die elkarteak: 07.00etatik 19.00etara. Halaber, familia bakoitzak ordaindu beharko duena irabazien araberakoa izanen da. "Gainerakoa, besteak beste, CAF, MSA eta Hiri Elkargoaren esku geldituko da", ohartarazi du Bidartek.

"B" dispositiboa: osoki euskaraz

Ttinka haurtzaindegiaren egitasmoak xede ezberdinak bete nahi dituela nabarmendu du Gamarteko auzapezak. Burasoei hurbileko zerbitzu bat eskaintzeaz gain, lanpostuak sortu eta herria dinamizatu nahi du. Azpimarratu duenez, helburu nagusienetariko bat euskararen erabilpena sustatzea da.

Hain zuzen ere, Baxe Nafarroan dauden haurtzaindegiek, hala nola, Orzaize eta Huarte-Garazikoek zerbitzu elebiduna proposatzen dute. Bénédicte Luberriaga departamenduko kontseilaria eta Euskararen Erakunde Publikoko lehendakariordearen erranetan, Ttinkak Lehen haurtzaroaren euskarazko harrera dispositiboko (LEHA) "B" modeloa segituko du. Hau da euskarazko harrera.

LEHA labelizatze prozesuaren baitan, hiru dispositibo daude: A, B eta C. Alde batetik, lehenengoan, burasoen hautuaren arabera, haurrari euskaraz edo frantsesez ari zaio. Azkenik, C dispositiboan langileen erdia haurrari euskaraz ari zaio eta beste erdia, ordea, frantsesez.

Luberriagak aipatu duenez, labelizatze ibilbidean bi maila daude: kargu kaierako arauak errespetatzen dituenak eta labelizatze bidean dagoena. Arau guztiak bete ahal izateko laguntza eskaintzen du EPPk. Adibidez, euskarazko formakuntza proposatuz langileei. Lakarran antolatutako agerraldian, lehendakariordeak labela eskatzeko gonbidapena luzatu die Ttinka elkarteko kideei.