Argitxu DUFAU

Futbolari euskaldunak eta okzitaniarrak, euskararen alde

Uztailaren 25ean 18.00etan Donibane Lohizuneko Pavillon Bleu kirol zelaian, Reala eta Okzitaniako Toulouse FC taldeek futbol partida bat jostatuko dute. Ekimenaren irabaziak Bernat Etxepare lizeoa finantzatzeko bideratuko dira.

Futbol partida uztailaren 25ean 18.00etan Donibane Lohizuneko Pavillon Bleu kirol zelaian iraganen da. ©Bob EDME
Futbol partida uztailaren 25ean 18.00etan Donibane Lohizuneko Pavillon Bleu kirol zelaian iraganen da. ©Bob EDME

"Tradizioz", Seaska elkarteak futbol partida garrantzitsu bat antolatzen du Donibane Lohizuneko Herriko Etxearekin batera. Aurtengo ekimena uztailaren 25ean, 18.00etan, iraganen da Donibane Lohizuneko Pavillon Bleu kirol zelaian.

Larunbateko partidan, Realeko jokalariak Toulouse FC taldearen kontra arituko dira. Partida lagunartekoa izan arren, Realeko arduraduna den Joseba Ibarburuk "partida serioa" izanen dela nabarmendu du. Beste behin ere, ekipa gipuzkoarrak euskararen aldeko engaiamendua erakutsi du.

Partidaren irabaziak Baionako Bernat Etxepare lizeoarentzat bideratuko dira. "Lizeoak heldu diren urteetako lanaren herena errepresentatzen du eta horrek lan asko eskatzen du", esplikatu du Seaskako lehendakaria den Paxkal Indok.

Euskararen alde

Halaber, ekimenaren parte hartzaileen engaiamendua azpimarratu du. Alde batetik, taldeena, "euskaldunak eta okzitaniarrak dohainik euskararen alde jostatuko direlako", erran du Indok. Bestalde, Donibane Lohizuneko eta Seaskaren arteko lankidetza azpimarratu du. "Ez da beti erraza Seaskarekin lan egitea eta Donibane Lohizunen beti ongi pasatzen da, laster emaitzak ikusiko dituzue", gehitu du.

Partidaren sarrerak Donibane Lohizuneko turismo bulegoan salgai dira; 12 eta 20 eurotan. Halaber, Ibarburuk Donostian kokatuak diren Realeko dendetan ere erosi daitezkeela aipatu du. "Jokalari hoberenak hor izanen dira", segurtatu du taldeko arduradunak.

Kirol zelaian jarririk 2.200 pertsona sartzen dira eta xutik beste 2.000. Partida ezingo da telebistan ikusi eta "hobe", irriz gehitu du Paxkal Indok.