Euskal Herria eta Katalunia bizikletaz lotuak ofizialtasuna aldarrikatzeko

Euskal Herria eta Herrialde Katalanak lotuko dituen ‘2 Nazioak Bizikletan’ kirol ekimena aurkeztu dute Donostian. Helburua da bi selekzioen ofizialtasuna eta herrien independentzia bizikleta gainean aldarrikatzea, eta horretarako bi nazioak lotzen dituzten 941 kilometroak bizikletaz eginen dituzte.

Naiz|2015/07/08 15:30|0 iruzkin
2nazioak_941_km_aurkezpena
‘2 Nazioak Bizikletan’ ekimenaren aurkezpena Donostian. (BI NAZIOAK BIZIKLETAN)

Aurreko urtean Euskal Herriko zazpi hiriburuak bizikletaz lotu ondoren, aurten Tourraren aitzakia hartuta ‘2 Nazioak Bizikletan’ ekimena aurkeztu dute Donostian. Ekimenaren helburua da Euskal Herriaren eta Herrialde Katalanen independentzia eta selekzioen ofizialtasuna bizikleta gainean aldarrikatzea.

Horretarako, Iban Gartzia eta Jon Bikendik bi herriak lotzen dituzten 941 kilometroak bizikletaz eginen dituzte. Bi txirrindulariak Port Boutik abiatuko dira uztailaren 11ean goizeko 06.00etan, eta 14ean Hendaiara iritsiko dira, Pirinioetan zehar Tourrarekin bat eginez.

Txirrindularien hitzetan, "ikusarazi nahi dugu munduko herri zapaldu guztien arteko ahalegin, ilusio, errespetu, borroka eta maitasunarekin lortuko dugula lotzen gaituzten kateak behingoz apurtzea eta beste mundu bat posible dela erakustea".

Ekimenak 20 enpresa, hedabide eta babesleren laguntza eskuratu du, eta atxikimenduen artean Kataluniako Txirrindularitza Federazioa, Kataluniako Kirol Selekzioen Aldeko Plataforma edo Jauzia ekimena daude. Mikel Astarloza edo Naia Alzola bezalako txirrindulariek ere babesa adierazi diote ekimen honi.