Ibon Fernandez Iradik preso segituko du

Maiatzaren 7an, ostegunean, Ibon Fernandez Iradiren kondena eteteko eskaeraren erantzuna jakin da. Dei Auzitegiak "bere eritasuna ez dela traba bat espetxean gelditzeko" adierazi du, beraz kartzelan egon beharko du. Egun berdinean, Bagoaz kolektiboak Baionako herriko etxean elkarretaratzea antolatu du.

Iurre BIDEGAIN|2015/05/07 07:50|0 iruzkin
Img_2754
Ibon Fernandez Iradiren aldeko elkarretaratzea Baionan.

Dei Auzitegiak, maiatzaren 7an, Ibon Fernandez Iradiren kondena eteteko eskaeraren erantzuna iragarri du. Bere abokatua den Maritxu Paulus Basurcoren arabera, Dei Auzitegiak euskal presoaren eritasuna ez dela traba bat espetxean gelditzeko erran du. "Epaileak bere patologiaren garapena aitzinetik ezin dela aurreikusi erran du", zehaztu du abokatuak. Beraz, esklerosis anizkoitza duen euskal presoa espetxean gelditu beharko du.

Bagoaz kolektiboak gaurko erabakiaren aitzinean "haserre handia" adierazi du. "Lau urte darama eskaera egiten eta denbora huntan aitzakiak edo aldaketak baizik ez dira agertu. Argiki, Ibonen eskubideak ez dira errespetatzen", adierazi du Bagoazeko kidea den Emilie Martinek.

Halaber, bere iritziz "maniobra politikoak" dira, "gaixorik dagoen preso bat ez askatzeko". "Gaur, etapa juridiko baten amaieran gira, baina bere askatasuna aldarrikatzen segituko dugu", azpimarratu du Martinek.

Are gehiago, EH Baik Ibon Fernandez Iratiren "egoerak espetxean okerrera egin" dezakeela pentsatzen du. "Berehala aska dezaten eskatzen dugu. Bide beretik gaixorik diren preso guztiak askatzea eskatzen dugu", aldarrikatu du alderdi politikoak.

"Kontraesanez" betetako azterketak

Fernandez Iradik hiru osasun azterketa pasa ditu; azkenak bere egoera kartzelarekin bateragarria dela adierazi du. Deliberoa jakinen den egun berdinean, Bagoaz kolektiboak Baionako herriko etxe aitzinean, 18.30etan, sostengu elkarretaratzea antolatu du.

Martxoaren 26an, justizia frantsesak Fernandez Iradiren defentsak eta prokuradoreak ezarritako helegiteak aztertu zituen. I. Fernandez Iradiren abokatua den Maritxu Paulus Basurcok eta Bagoaz kolektiboak azken osasun azterketa "kontraesanez" betea dagoela salatu dute.

Bagoazen ustez, Ibon Fernandez Iradiren gaineko erabakia, "erabaki politikoa" da. "Onartezina da gaur egun oraindik preso atxikia izatea, ahalgegarria da Estatu frantsesaren aldetik, bere burua demokratikotzat jotzen duen estatu baten aldetik". "Ahal bezain baldintza hoberenetan artatua izan dadin", euskal presoen giza eskubideen aldeko taldeak bere askatasuna aldarrikatu du.

 

ERLAZIONATUTAKO ALBISTEAK