David Zurutuzak euskara eta kirola lotuko duen ikastaroa eskainiko du

Errealeko jokalaria den David Zurutuzak uztailaren 6tik 10era, euskaraz izanen den futboleko ikastaro bat eskainiko du. Kanbon, hizkuntza eta kirola lotuko dituen hitzorduek entrenamenduez gain, beste hainbat aktibitate proposatuko ditu.

 

Charlotte DALMONT|2015/04/20 10:55|0 iruzkin
Kaz_zurutuza_bobedme102
Paskal Indo , David Zurutuza eta Vincent Bru - © Bob Edme

Uztailaren 6tik 10era Errealeko jokalaria den David Zurutuzak 7 eta 13 urte bitarteko haurrentzat zuzendua izanen den ikastaro bat proposatuko du. Ikastaroa euskara osoz izanen da, jokalariak "hizkuntza oso garrantzitsua dela" berarentzat azpimarratu du. Hitzordua Kanbon iraganen da. "Kanbo erdigunean da. Hautu ona da Ipar Euskal Herriko haur guztiak hurbiltzeko", adierazi du kirolariak.

Kanboko Herriko Etxeak ikastaroarentzat beharrezkoak izanen diren ekipamenduak eskainiko ditu, "garrantzia handiko" hitzordua delako. "Interesa handia dago euskara irakasteko eta bizi sozialean, baina baita ere kirolean erabiltzeko", adierazi du Kanboko auzapeza den Vicent Bruk.

Orotara 70 haur inguruk parte hartzen ahalko dute ikastaro huntan. Hamabi adituek aktibitateen gidaritza eramanen dute eta horien artean David Zurutuza. Hain zuzen ere, futboleko bi entrenamendu antolatu dira: bat goizean eta bestea eguerdian. Horretaz gain, haurrek bi joko antolatuko dituzte. "Dietetika eta sorospen kurtsoak prestatu dira ere", zehaztu du Zurutuzak.

Ikastaro hunen irabazi guztiak Seaskari bideratuko dira. Errealeko jokalarien ustez, "beharrezkoa den sostengu ekonomikoa" izanen da, "euskarak mementu zaila bizitzen duelako". Hitzordu huntan hainbat balore gogoratuko dira ere: adibidez, errespetua edo osasunarentzat gomendagarria den elikamoldea.

Izena emaiteko:

165€ haur bakoitzarentzat eta aste osoarentzat
Telefonoz: 06 21 13 09 74
Internetez: imprimaki bat bete eta Kanpusa Zuru- ELI-S, 4 FRancis Jammes bidea- 64220 Hazparne helbidera igorri.

Antolatzaileek, ikastaroarentzat beharrezkoak diren ekipamenduak Baionako Kutxabank (Thiers karrika, 26) gunean hartzen ahalko direla zehaztu dute.

ERLAZIONATUTAKO ALBISTEAK