Hainbat turismo operadorek sanferminetara jendea erakartzeko eraso sexisten irudiak arabiltzen dituztela salatu dute Iruñeko peñek. Zentzu honetan, jaietarako hiru hilabete baino gutxiago falta direnean, beren kezka adierazi nahi izan dute, Iruñeko Herriko Etxeari «neurriak» hartzea eskatuz eta «erantzun tinko bat» ematea iradokiz.

Salatu dutenez, turismo operadoreek, besteak beste, urtero txupinazoan ikusten diren erasoen irudiak erabiltzen dituzte. «Irudi hauek erabiltzeak, eta erakundeen partetik erantzunik ez egoteak, eraso hauek behin eta berriro burutzea ahalbidetzen du, baita 9 egunez gure hiria legerik gabekoa bihurtzea ere».

Iaz, Herriko Etxeak eraso sexisten kontrako kanpaina zabaldu zuen, baina aurten hedatutako kartel hauen aurrean, gaur egun, ez du erantzunik eman. Zentzu honetan, nabarmendu dute jai giroak eta alkoholak ez dituztela, «inolaz ere, jarrera sexistak justifikatzen».

Honela, norberak jaiak «nahi duen moduan» gozatzeko eskubidea aldarrikatu dute. Hau dela-eta, erasorik gabeko jai parekide batzuen alde lanean segituko dutela azpimarratu dute.