Xiberoa Eguna larunbatean ospatuko da Donostian eta egitarau zabala izanen du, goizetik arratsaldera. Josu Ruiz, Kiroletako eta Garapen Ekonomikoko zinegotzi ordezkariak; Amaia Almirall, Donostia Kulturako zuzendari-gerenteak; Dominique Boscq, Xiberoa Herri Elkargoako lehendakariak, eta Michel Etchebest, Mauleko auzapeza eta Xiberoa Herri Elkargoko lehendakariordeak eman dituzte xehetasun guztiak, agerraldi batean.

Xiberoaren Egunak Euskal Herriko lurralde txikiena zer den eta zertan den agerira ekartzea du helburu, jendeak hobekiago ezagutzeko parada izan dezan.

Horretarako, egitarau zabala prestatu dute. 11.00etatik 17.00etara San Telmo museoan hainbat erakusmahai jarriko dituzte Ekitaldi Aretoan, Xiberoako baliabide desberdinen berri emaiteko. Bideoz eta argazkiz lagunduta, bertako jarduerak, txokoak... azalduko dira: laborantza, artzaintza, Kakueta eta Holtzarteko arroilak, Irati oihana... Turismo egituren arduradunak han izanen dira eta hautetsi batzuk ere Donostiara hurlbilduko dira, publikoari harrera egiteko.

Ikusgarrien erakuslehioa

Maskaradari buruzko argazki erakusketa ere ikusgai izanen da, baita familientzako tailerra ere, maskaradaren pertsonaia den zamaltzainaren inguruan.

Jardunaldia osatzeko, 20.00etan, ‘Baküna Show’ ikuskizuna taularatuko du Victoria Eugenia antzokian Kompany Beritza elkarteak.