EH Bairen ustez, Syrizaren garaipenak Europako herrien esperantza piztu du

EH Bairen ustez, Syrizaren garaipenak itxaropen handia ematen die Europan austeritate politika antzekoak bizitzen dituzten herriei. "Gora Grezia, gora Syriza!" aldarrikapenarekin, poza sentimendutik, EH Baiek Syriza eta greziar herriari sustengua adierazi die.

Kazeta|2015/01/26 11:13
Guz_ehbai_91
EH Baiek Syrizaren garaipena baloratu du. Argazkia Gaizka IROZ.

EH Baiek Syriza alderdi ezkertiarraren garaipena baloratu du. Bere iritziz Alexis Tsiprasen alderdiak irabazi izana "Europako herri guztientzako esperantza" pizten du. Batez ere zuhurtasun neurri antzekoak pairatzen dituzten Europako herrien itxaropena pizten du.

EH Bai alderdiaren iritziz, austeritatearen neurri hauek "deregulazioa bultzatu eta lan eskubideak etengabe murrizten dituzte". Horri lotua, gaur Frantses estatuko legelbiltzarrean hasten den Macron legearen proiektua aipatu dute. Gogorarazi behar da horren kontrako elgarretaratzea eginen dela Baionako herriko etxearen aitzinean 12.15etan.

"Pozten dira" Syrizaren "garaipena ederraren ondotik", eta "berri hau ezin hobea da greziar herriarentzat". Grezia, "azken urteetan bankuen interesen fagoretan pobretasuna areagotu duten Troïkaren agindu zorrotzak jasan behar izan dituen" herria da, EH Bairen ustez.

EH Bai Syriza eta Greziar indarrari sustengua erakutsi nahi izan dio. "Ondoko aste eta hilabeteetan, lehiaketa hutsa eta etekinaren aldeko lasterkaldiaren ordez, justizia soziala eta aberastasunen banaketa oinarritzat dituen bestelako jendarte proiektuaren alde borrokatzen duten indar guztien sostengua beharko du", adierazi du Ipar Euskal Herriko alderdi politikoak.

ERLAZIONATUTAKO ALBISTEAK