Euskal laborantzaren nortasun agiria, etorkizunari so

Euskal Herriko Laborantza Ganbarak nekazaritzaren azterketa sakon bat egin du, bi ataletan islatua. Helburua lurraldearen errealitatea ezagutaraztea da, laborantzako aktibitate dinamiko eta erakargarri bat mantentzeko.

Justine GIRAUDEL |2015/01/09 09:57|0 iruzkin
Guz_laborantza_bobedme102
Ainhiza Monjolosen Laborantza Ganbarak egindako azterketa aurkeztu du. Argazkia Bob EDME.

Laborantza ganbarak hamar urte betetzen ditu. Ibilbide luze huntan lan handia egin du tokiko laborantza bizirik mantentzeko. Gaurkoan, "Ipar Euskal Herriko laborantzaren egoera eta garapena, euskal mendiari begira" lelopean azterketa sakon bat argitaratu du. "Zein dira Ipar Euskal Herriko eta bere mendian den laborantzaren zenbakiak? Nolakoa da azken urteetarik gaur arteko bilakaera?".

Galdera horiei erantzuten die EHLGk bi ataletan plazaratu duen lanak. Ipar Euskal Herriko, baina batez ere mendialdeko laborantza ezagutarazteko helburuarekin, nekazaritzako estadistikak zabaldu dituzte. Mixel Berhocoirigoin, Laborantza Ganbarako lehendakariak adierazi du xedea "euskal mendia laborari anitzez betea segitzea eta gazteentzat erakargarria izaitea" dela.

Lan sakona egiteko, Laborantza Ganbara 2010. urteko datu bilketa publikoan eta elkargo eta kantonamenduen biztanleriaren kondaketan oinarritu da. Halaber, Biharko Lurra Elkarteak plazaratutako datuek lagundu dute. Azken finean, azterketa hunek "euskal laborantzaren nortasunaren agiriaren lehen urratsa errepresentatzen du".

Azterketaren ondorioak

Besteak beste, EHLGk egindako azterketak laborantzaren arloan familien artean egiten den transmisioa ez dela aski etxaldeen berrikuntza zihurtatzeko ondorioztatu du. Beren ustez, familiaren transmisioaz kanpoko gazteen instalazioa giltza egokia izan daiteke. Horretarako, gazteengandik sortutako iniziatiba horiek sustengatu beharko lirateke.

Gogorarazi behar da, Laborantza Ganbara 2005. urtean sortu zela "Iparraldeko kuadro instituzionalaren eraikuntzan parte hartzeko eta laborantza herrikoia garatzeko, laborarien, naturaren eta kontsumitzaileen errespetuan". Hamar urte beranduago lan hori egiten segitzen du eta honen isla argitaratutako lana da.

Laborantza Ganbarak iragarri duenez, liburuxka bana eskainia izan zaio Ipar Euskal Herriko Herriko Etxe bakoitzari eta honen interesa duen elkarte eta estruktura bakoitzari.

ERLAZIONATUTAKO ALBISTEAK