Kazeta

Manex Erdozaintzi-Etxarten poesia irakurriko dute Donapaleun

Zabalik elkarteak heldu den irailaren 28an Hinki-Hanka olerki liburuaren irakurketa kolektiboa antolatu du Donapaleun. 80 lagunek haien artean aldizkatuz irakurriko dute goiz osoan zehar idazle baxenafarraren lehen olerki obra.

Manex Erdozaintzi-Etxarten Hinki-Hanka liburua irakurriko dute Donapaleun. (Wikipedia)
Manex Erdozaintzi-Etxarten Hinki-Hanka liburua irakurriko dute Donapaleun. (Wikipedia)

Manex Erdozaintzi-Etxart (1934-1984) amikuztar idazle izandakoari omenaldi berezia eginen diote heldu den irailaren 28an Donapaleun. Zabalik elkarteak sustaturik, 80 lagunek idazlearen Hinki-Hanka lehen olerki liburua irakurriko dute goiz osoan zehar. Hitzordua goizeko 9etan emana da herriko mediatekan eta eguerditan aperitifan bilduko dira bertaratutakoak.

Amikuzeko euskalgintza biltzen duen elkarteak azaldu duenez, Manex liburutegiaren kudeaketa segurtatu du hogei urtetan zehar. Alta, duela urte eta erdi lan batzuk zirela eta, kanpora atera behar izan zuten eta Euskal Elkargoko zerbitzuek ez zuten onartu itzultzea. Bilkura ainitz egin ondotik, akordio bat lortu zuten eta ondoko hilabeteetan liburutegiaren parte bat mediatekara itzuliko da.

Hori dela eta, Zabalik elkarteak ekimen berezi hau egitea deliberatu du, idazlearen obra poetikoa ezagutarazi eta euskarazko irakurketa amikuztarren artean bultzatzeko.

Hinki-Hanka obra esanguratsua

Manex Erdozaintzi-Etxartek filosofia eta teologia ikasketak egin zituen eta gaztetatik, kristautasunarekiko eta Euskal Herriarekiko engaiamendua uztartu zituen. Idazleak eragin nabarmena ukan zuen Ipar Euskal Herriko proiektu ezberdinetan, batzuetan sortzaile besteetan laguntzaile. Besteren artean, Argi Bil elkartean, Herria eta Eliza kristau mugimenduan, Donapaleu eta Donibane Garaziko gau-eskoletan, Bertsolarien Lagunak elkartean, Seaskan edo Ikasen aritu zen lanean.

Bere obren artean ezagunena da Hinki-Hanka, bertan biltzen baitira poetaren obra osoa gidatuko duten gaiak: sorterria, ama, Euskal Herria, euskara, langileria... Donapaleun irakurriko duten liburuan 1958 eta 1976 urteen artean idatzitako 32 olerki biltzen dira.