"Gure agintarien arduragabeko akzio eza ikusirik, klimaren nazioarteko greba berri bat deitzen dugu, irailaren 20an, ostiralarekin, Week For Future asteaz segitua izanen dena", dio Fridays For Future Euskal Herri gazte ekologisten mugimenduak prentsari igorritako oharrak. Mobilizazioak prestatzeko eta mugimendua ezagutarazteko aitzinetik bilkura publikoa eginen dute larunbat honetan, Baionako Roland Barthes zelaigunean.
"Elkarrekin gure etorkizuna mehatxatzen duten politika horiei bukaera emateko" irailaren 20an Baionako Cassin lizeoan 8:15ean abiatuko da mobilizazioa eta Amazoniaren aldeko ekimen bat ere eginen dela iragarri dute. Ipar Euskal Herrian bezala, Hego Euskal Herrian ere taldeak antolatzen ari dira.
Klimaren alde aktiboak diren gazteak uda honetan Bordelen eta Lausanan elkartu dira. Azken honetan mundu osotik joandako 450 lagunek parte hartu zuten eta Euskal Herritik bertaratutakoek haien esperientzia partekatu ahal izan zuten.
Agintarien ekimen eza
Mugimendu ekologistak ohartarazi duenez, beroketa klimatikoa da uda honetan Amazoniako edota Siberiako oihanetan izan diren suteen eragile nagusia. "Munduan 5,8 milioi oihan hektarea baino gehiago erre diren bitartean, ez da aterabide konkreturik hartua izan aldaketa klimatikoari aurre egiteko", deitoratu eta suteek bertako biztanleen bizilekua eta bioaniztasuna suntsitzen dituztela gaineratu du.
Fridays For Future Euskal Herrik Biarritzeko G7 gailurrean munduko agintarien ekimen eza salatu du, ainitz mintzatu bai, baina neholako ekimenik ez dutela hartu azalduz.