Kazeta

Iratiko aintzira hustu eta erreka bilakatu dute berriz

Garaziko batzorde sindikalak goi-ordokia berregokitu du, naturala ez zen aintzira hustuz. Poctefa programa europarrari esker, Garaziko txaleta Etxola bilakatu dute. Gune honek artzaintzari eta gasnari arreta eskaintzeaz gain, ostatu bat ere badu.

Iratiko aintzira desagertu da. © Guillaume FAUVEAU
Iratiko aintzira desagertu da. © Guillaume FAUVEAU

Iratiko ordokia bere jatorrizko egoera naturalean da berriz, 60ko hamarkadan eraikitako aintzira artifiziala hustu eta Irati errekak bere bidea hartu baitu. Erabaki hori Garaziko batzorde sindikalak hartu eta gauzatu du. "Kanpoalde guzia egokitu dugu, bereziki autokarabanen lekua, ez baitugu nahi bertara jiten diren pertsonek autokarabana erakusketa bat ikustea. Aintzira mantentzeko arazo ainitz ziren. Ordokia antzina zen bezala egokitu dugu, 40ko hamarkadako argazkiak erabiliz", erran zuen uztailaren 28an Jean-Jacques Oillarburu Garaziko batzorde sindikaleko idazkariak France Bleu Pays Basque irratian.

Halaber, artzaintza eta gasna fintzeko lana sustatzeko xedez, hemendik aitzina Garaziko txaleta Etxola izanen da. Ostalaritza eremuaren garapenarekin batera, interpretazio gunea berregokitu dute, artzain etxola bat, artzaintzari buruzko filma bat eta gasna zahartegi bat eskaini ahal izateko. "Bertan sartzerakoan, gasna sentitu behar da", erantsi du Oillarburuk. 

Etxolaren berregokipenerako lanak nagusiki Poctefa programa europarraren funtsetatik diruztatua izan da, orotara 260.000 euro inguruko kostuarekin. Erreka bere bide naturalera itzularazteko 230.000 euro behar ziren.

Egun, Iratiko aktibitate nagusia artzaintzak izaten jarraitzen du. 17.000 hektareatan, 60.000 ardi, 3.500 behi eta 750 zaldi metatzen dira urtero. 400 bat artzainek alokatzen dituzte lurrak eta 150 artzain borda daude, horietarik 100 betetzen direlarik.