Iurre BIDEGAIN

Gazteen arteko harremanak euskaraz eraiki dituen espedizioa

Euskarabentura espedizioaren bigarren edizioa bukatu da uztailaren 31n Getxon. Euskal Herriko 121 gaztek 798 kilometro zeharkatu ondotik egindako bilana ezin hobea da. Pixkanaka-pixkanaka helburuak betetzen doa, hots, gazteen arteko harremanak euskaraz eraikitzea.

"Kristona".  "Oso-oso ondo". Horrela definitu dute Mattin Rafu begiraleak eta Ane Artola gazteak Euskarabenturaren espedizioa, hurrenez hurren. Uztailaren 1ean Mauletik abiatu eta, jzioquitarrak deituriko parte hartzaileak Getxora ailegatu ziren uztailaren 31n.

Poliki-poliki Euskarabentura finkatutako helburuak betetzen ari da. Horien artean, Ipar Euskal Herriko gazteen parte hartzea indartzea. Iaz hiru gazte soilik animatu baziren, aurten sei lapurtarrek zein baxenafartar batek bat egin dute abenturarekin. Horien artean Ane Artola urruñarrak.

Etxera ailegatu gabe ere, espedizioa polita eta oso interesgarria izan dela aitortu du emozioz beteta. Nahiz eta hasieran pixka bat luzea egin zitzaion, hilabetea oso azkar pasa dela nabarmendu du. Espedizioa abiatu aitzin bere xedea euskara hobetzea zela azaldu zion KAZETA.EUSi eta helburua bete duela aipatu du harrotasunez beteta. "Nire euskara asko-asko hobetu dut. Hego Euskal Herrian erabiltzen diren hitz asko ikasi ditut eta lagun asko egin ahal izan ditut ere", dio. Horri lotuta, gehien maitatu duen animazioa zein den galdegitean, erantzuna argi du: "soziolinguistikari loturiko hitzaldiak". Horri esker, probintzi bakoitzean euskararen egoera zein den ezagutu ahal izan du.

Belaunaldiak elkarrekin

Hogeita hamaika etapa eta 798 kilometro. Euskarabenturak euskararen erabilpena sustatzeaz gain, hainbat balore transmititu dizkie gazteei eduki aberatsez beteriko animazioen bidez. Hala nola, parekidetasuna, elkar errespetua eta ingurumenarekiko errespetuzko bizi-ohitura jasangarriak, besteak beste. Orotara, 50 mintegi, tailer eta jarduera baino gehiago antolatu dituzte.

Horietatik "bereziki aberasgarriak" izan dira bi Belaunaldi Arteko egunak, antolatzaileen erranetan. Hain zuzen, uztailaren 7an Zubiritik Iruñera eta uztailaren 24an Donostiatik Zarautzera 2018ko hainbat beterano etapak gazteekin egitera animatu ziren.

Mattin Rafu Ruizek begirale gisa parte hartu du Euskarabenturan. Hain zuzen, Mauletik Zubirira eta Irunetik Biarritzera eskuz-esku ibili da gazteekin batera. "Pertsonalki, izugarria izan da", erran du liluratuta. Gazteen artean sortuko sareak "ukitu" duela azpimarratu du. Harreman hori ez da bakarrik gazteen artean eraiki, begiraleen artean baizik. "Piña" bat sortu ahal izan dutela kontatu du, kasik ahotsik gabe iragandako agur bestaren ondotik.

"Euskarabentura aurrera" doala uste du. Antolatzaileen erranetan, proiektua egonkortuta eta aitzina segitzeko moduan dago. Ane Artolak heldu diren urteetan parte hartu nahiko luketen gazteei deialdi bat luzatu die: "Ez ukan beldurrik, esperientzia oso ona delako. Asko ikasteko parada eskaintzen du, batez ere Euskal Herriko kulturari dagokionez".