Badira urteak Baionako bestetako igandean Patxa plazan euskal presoen aldeko bazkaria egiten dela eta aurten ere 200 bat pertsona bildu ziren mahaiaren inguruan, jateko, kantatzeko baina batez ere presoei eta haien senideei sustengua emateko.

Antolatzaileek bazkalondoan ekitaldi ttipi bat egin zuten. Goizetik zazpi kadira hutsik ageri ziren eszenan, Ipar Euskal Herriko presoen argazkiak itsatsiak zituztela, tartean maiatzean atxiloturiko Josu Urrutikoetxearena barne. Aitor Servierren bertsoek eman zioten idekiera omenaldiari.

Ondotik, Oihana Parotek hartu zuen hitza. “Iazko Baionako bestetatik honat frantses estatuaren aldetik urrats batzuk eman dira, baina ez euskal presoen auzia konpontzeko borondatea dutelako. Euskal Herritik egiten ari den lan zabalari esker mugiaraztea lortu dugulako baizik”, adierazi zuen urte honetan izan diren urratsak eta oztopoak nabarmenduz.

Parotek bereziki aipatu zuen kartzelaldiaren 30. urtean sartuak diren Xistor Haramboure, Jakes Esnal eta Ion eta Unai Paroten egoera. “Haiek preso mantentzea ez da erabaki juridiko bat. Erabaki politikoa da”, erran zuen hitzartzean eta ondoko hilabeteetan lehentasunez haien baldintzapeko askatasuna lortzeko azkarki lan egitera deitu zituen bildutakoak.

Eritasun larri baten ondorioz aurten zendutako Oier Gomez euskal preso ohia gogoan hartu ondotik, azken hilabeteetan kontrol judizialpean presondegitik atera eta Ipar Euskal Herrian bizi diren Mikel Barrios eta David Pla igo ziren eszenara. Haiei bestetako zapi gorria jarri eta kadiretan ziren euskal presoen argazkietan beste hainbeste egin zuten bi preso ohiek. Ohorezko aurreskuarekin bukatu zuten hurrengo urtean kadira hutsik gabe egin nahi luketen ekitaldia.