Baionako bestez gozatzeko Euskoa eskura

Euskal Moneta elkarteak Baionako bestetan tokiko moneta erabili ahal izateko gutun-azal bereziak eskainiko dizkie bestazaleei.

Kazeta|23/07/2019 07:25|0 comentarios
Eusko_baiona
Baionako Les Pyrenees ostatuak bost egunez ezingo duenez aldagune funtzioa bete, Patxokin ezarriko dute Euskoak lortzeko gunea. (Gaizka IROZ)

Euskal Moneta elkartea garatzen ari den komunikazio kanpaina berrian, Baionako bestek ere beren ukanen dute. "Baionako bestak Euskoz hobe!" ekimenarekin tokiko monetaren baloreak partekatzea da xedea eta hori dela eta, elkarteak ordainketa molde berri bat proposatzen du, bai Lapurdiko hiriko bestetarako bai uda osorako.

20 eta 50 euroko balioa duten gutun-azalak proposatuko dira. Barnean 18 eta 48 eusko eta bi euro balio dituen harpidetza txartela eskainiko dira. Gainera, euskararen erabilera sustatzeko, euskarazko elkarrizketak ukaiteko lexiko ttipi bat banatuko da.

Gutun-azal hauek Baionako Turismo Bulegoan daude eskuragarri, bai eta elkarteak Patxokin instalatuko duen gunean ere. Uztailaren 24ean 18:00etatik 22:00etara, ostegun eta ostiralean 11:00etatik 19:00etara, larunbatean 11:00etatik 15:00etara eta igandean 11:00etatik 18:00etara lortu ahalko dira euskoak.

Lau egunez Baionako bestetan euskoa erabiltzen ahalko den 57 lekuetako mapa ere eskainiko diote erabiltzeari. Elkarteak oroitarazi duenez, Baionako bestetan sartzeko esku-muturrekoa ere euskoz ordain daiteke, Baionako nahiz Donibane Lohizuneko turismo bulegoetan.

NOTICIAS RELACIONADAS