Kazeta

Lagun elkarteak eta Pôle Emploi egiturak hitzarmena izenpetu dute

1995etik Ipar Euskal Herriaren barnealdean presente den Lagun elkartea hauskorrak diren pertsonak profesionalki integratzeko tresna bat da, espazio naturaletako lanetan aritzera laguntzen dituena. Ekainaren 10ean Pôle Emploi egiturarekin tokiko partaidetzarako hitzarmen bat izenpetu zuen, enplegura hurbiltzen laguntzeko.

Lagun elkarteak, besteren artean, espazio naturaletan lan egiteko erraztasunak ematen ditu.
Lagun elkarteak, besteren artean, espazio naturaletan lan egiteko erraztasunak ematen ditu.

“Gurekin 24 hilabete egoten ahal diren pertsonak ditugu, baina helburua da lan kontratu mugatu edo mugagabe batekin oldar berri bat hartzea”, erran zuten ekonomia sozial eta solidarioko Lagun elkarteko kideek. Pertsona horiek partitu aitzin, Pôle Emploi egiturari loturik ibilbidearen segimendu bat izanen da. “Pertsona hauek jadaneko ez dute izanen bizitzan zehar ainitzetan pairatu behar izan duten hausturarik”, adierazi zuen Eneko Ithurbide elkarteko zuzendariak.

Lagun elkarteak enplegu formaziorako kontseilari bat kontratatu du, egituran lehendik lanean ziren gizarte laguntzailearekin eta erizainarekin batera jarduteko. “Bere xedea da Lagunen inguruko ehun ekonomikoarekin harremana erraztea, enplegura atxiki ahal izateko”, erantsi du Ithurbidek.

2016tik elkarteak egoitza Donazaharren du kokatua eta egun, hogeita hamar bat pertsonek jasotzen dituzte haren lanaren onurak. Donapaleura lotura garraio bat martxan baldin bazuen, orain Xiberoarako beste bat jarri du, lan sailetara joateko edo langile berrien hartzeko. Garraiobide berri honek Maule ere lotuko du.