“Uztariztarrek borondate azkar bat dute hazkunde handiko urbanizazioaren mugak ikusteko”

Iragan maiatzaren 6an uztariztar talde bat Uztaritzeko etorkizuneko Hirigintza Planaren kontra agertu zen. Gisa horretan, eraikigarriak diren lurrak landa eta laborantza eremu gisa ber-kalifikatzea deitoratu zuten. Bruno Carrere Uztaritzeko auzapezak eta Mikel Goienetxe hirigintza axuantak haien argudioak eman dituzte MEDIABASKen.

Anaiz Aguirre Olhagaray|14/06/2019 07:25|0 comentarios
Etx_140327_914154
Uztaritzeko auzapezak gogora ekarri du legealdi hastapenetik promotoreen espekulazioarekin bukatzeko harturiko engaiamendua. (Aurore Lucas)

Herritar talde batek uste du Hirigintza Plana laborantza eremuetarako egina dela. “Zona eroaz” mintzo dira. Zer diozue honi buruz?

Bruno Carrere: arauak ikusi behar dituzte. Berez, eraikuntza masiboak murriztu nahi baditugu, eremuak birbegiratu behar ditugu eta ondorioz, eraikigarriak ez diren eremutara itzuli, legea aplikatuz. Hots, laburtzeko, “laborantza edo natura eremu” bilakatu. Ez dugu beste aukerarik.

Mikel Goienetxe: Frantziar Estatuan, lurra eraikigarria da edo ez da. Urbanizazioa mugatu nahi badugu, U urbanizazioa (urbanizatua dena) utzi behar dugu. Dauden aukera bakarrak laborantzakoak edo naturalak dira. Administrazioei galdegiten diegu. Zergatik ez dago eraikia den laborantza? Hau ez da existitzen. Egungo Hirigintza Plana eta etorkizunekoa hartzen baditugu, laborantzarako 330 hektarea gehiago daude. Baina zatika zatika hartuz, laborantza lurren emendatzea 72 hektareetakoa da.

Bruno Carrere: Egoera hau ez da soilik Uztaritzen gertatzen. Eraikigarriak ez diren eremu guziak A (laborantza) edo N (naturala) kalifikaziora pasa behar dira. Ohartu nahi dut ere kontuan hartu dugula A eta N eremuak jadaneko eraikiak direla, baina lege murriztaileago baten testuinguruan gaudenez (oharra: Alur etxebizitza legea), zeinak urbanizazioa hiri-erdigunean gehiago kokatzera kokatzera eramaten duen, A eta N eremuetan arautegi bat plantan emana izan da, egun bertan bizi direnei malgutasun gehiago ematen zaielarik.

Opositore hauek, hainbat lurren “debaluazioa” salatzen dute laborantzara iragan direlako. Haien lurra birsalduko balute, galtzaile lirateke. Haien kezka ulertzen al duzue?

Bruno Carrere: Kasu gehienetan hau faltsua da. Norbaitek, ondasun edo etxe baten jabea izanki, dagoen bezala saldu nahi badu, kontrakoa da gertatzen dena. Babesturiko eremu batean kokaturiko etxea salduko du, izan ere, definizioz, ezin baita inguruan eraiki. Aldiz, etxea eraikigarria den eremu batean saltzen badu, erosleak eraikin edo etxe multzo baten ondoan egoteko arriskua du. Bistan denez, eroslearen logikan baldin bagaude - mundu guziak du logika hori - babesturiko edo aldakorra ez den eremuak balioa gehiago izanen du. Arrazoitze hau higiezinen profesionalek baieztatua da.

Mikel Goienetxe: Argudio hau metro karratuko hartzen badugu, hain zuzen ere, balioa galtzen du, baldin eta jabeak lurren banaketa bat egin nahi badu. Baina espekulatu eta saldu nahi duten guzientzat galtzen du balioa. Haien jabetza babestu eta berantago saldu nahi dutenek, eraiki gabeko lur bat badute eta ez bada eraikigarriak ez diren beste eremu batzuen bezain eraikigarria, etxeak balioa hartuko du. Egun, ez da egia metro karratuak erosten ditugula. Eta prezioa metro karratuetara mugaturik ere, errealitatea da ondasuna erosten dugula. Oroitu behar da ere duela 40 edo 50 urte laborantza lurrak zirela.

Ez al da herriaren kontrakoa herri hauteskundeak baino hilabete batzuk aitzinetik Hirigintza Plan hau defendatzea?

Bruno Carrere: Kontrakoa pentsatzen dugu. Harturiko engaiamenduei lotzen gara, eta uztariztarrek borondate azkar bat dute hazkunde handiko urbanizazioaren mugak ikusteko. Ez dakit termino egokiena ote den, baina edozein gisaz, horrela bizi izan da... eta baita hiri erdigunean zentraturik, ingurumenarekiko errespetu handiagoz eta etxebizitza sozialetara aitzinatzera eramanen gaituen Hirigintza Plan bat ukaitera iristeko ere. Zergatik edo nola azaltzeko hamarnaka uztariztar errezibitzen ditugu Herriko Etxean.

Mikel Goienetxe: Teknikoki lagundu eta aholkatu ditugu. Aldatzeko prestatu dira, egia baita inpaktagarria dela.