G7 Ez! plataformak mobilizazio egitaraua aurkeztu du

Agorrilaren 24tik 26ra Biarritzen munduko 7 herrialderik aberatsenak G7 gailurrean bilduko direla eta, haren kontrako plataformak mobilizazio andana bat antolatu du. Besteren artean, agorrilaren 19tik 24ra kontra-gailurra eta alternatiben herrixka iraganen da Urruña, Hendaia eta Irun artean.

Kazeta|07/06/2019 07:50|0 comentarios
G7_ez_itsasoan
Irudian, Donostian G7 gailurraren kontra egindako ekimena. @G7ezplataforma

Biarritzen eginen den G7 gailurra hurbiltzen ari da eta Euskal Herrian motorrak berotzen ari dira “aberatsenen eta multinazionalen” sistema iraunarazten duten munduko zazpi potentziei aurre egiteko. Azken hilabeteetan herri eta hirietan hamaika aurkezpen eta bilkura egin ondotik, G7 Ez! plataformak atzo aurkeztu zuen ekainetik agorrilera bitarteko mobilizazio egitaraua.

Ekainaren 22an, larunbatarekin Gipuzkoako plataformak manifestazioa deitu du Donostian, arratsaldeko 17:00etan Easo plazatik abiatzeko.

Hurrengo hitzordua Biarritzen berean izanen da, Frantziako Errepublikaren egunaren bezperan, hots, uztailaren 13an. Manifestazioari 17:00etan emanen zaio hastapena Loreen hipodromoan.

Alternatiben herrixka eta kontra-gailurra

Plataformak beste mundu baten aldeko mezua zabaldu nahi du mobilizazioen bidez, ez soilik boteretsuenen sistema salatzeko, sistema horren aitzinean alternatibak badirela irudikatzeko baizik. Ildo horretan kokatzen da agorrilaren 19tik 24ra Urruña, Hendaia eta Irunen prestatu duten alternatiben herrixka eta gailurra.

Kontra-gailur honetan konferentziak, eztabaidak eta erresistentzia eraikuntzak landuko dira, Euskal Herriko eta beste lekuetako mugimendu, elkarte eta sindikatuen partaidetzarekin. Zazpi bloketan antolatuko dira eztabaidak, ezberdintasunik gabeko eta ingurumena errespetatuko duen mundu sozial eta justu baten aldeko gaiak jorratuz.

Kontra-gailurraren azken egunean, manifestazio bat eginen da Irun-Hendaian. Biharamunean, agorrilaren 25ean, G7 gailurraren segurtasun zonalde urdin eta gorriaz haraindi, “ortzadar” zonaldea osatu nahi dute Angelu, Biarritz eta Baiona artean. Xedea manifestatzeko debekuak salatzea izanen da.

Hain justu ere, mehatxuen eta oztopo guzien gainetik, plataformak mobilizazioetan parte hartzeko deia luzatu du eta ostalariak, merkatariak, enpresak eta jende guzia G7 gailurrarekin ez kolaboratzera animatu du.