Kazeta

Ahatsa eta Mendibeko eskolek blokeaturik hasiko dute astea

Baxe Nafarroako bi herrietako ikasleen burasoak apirilaren 29an astelehenarekin mobilizatuko dira. Gisa horretan salatuko dute frantsesezko lanpostu erdi baten kentzea.

Ahatsako eta Mendibeko eskolak blokeatuko dituzte apirilaren 29an. © Aurore Lucas
Ahatsako eta Mendibeko eskolak blokeatuko dituzte apirilaren 29an. © Aurore Lucas

Heldu den ikasturtean frantsesezko lanpostu erdi bat kenduko dute Ahatsako eta Mendibdeko eskoletan. Ikasleen burasoek ez dute hori gertatzerik nahi eta ondorioz, apirilaren 29an mobilizatzea deliberatu dute, eraikinaren ateak blokeatuko dituztelarik. Herriarteko hezkuntza elkargoak bost herritako haurrak hartzen ditu: Ahatsa, Mendibe, Behorlegi, Duzunaritze eta Lekunberri.

Mendibeko eskolak lehen mailako eskola elebiduna eskaintzen du, baina dituen 28 ikasleetatik bi frantses elebakarrak dira. Postu erdi hori kenduz gero, haientzat ez legoke hizkuntza horretan ikasteko aukerarik. Burasoen arabera, euskarazko irakaskuntzaren kalitatea ere kaltetuko litzateke, klasea beteegia legokeelako. Joan den apirilaren 9an zuzendari akademikoari igorritako gutunean,  bost herrietako auzapezek, burasoek eta RPI Hergaray sindikatuko ordezkariek haien ezinegona adierazi zuten. Erantzunik ez dute jaso oraino.