Ikas-Bi, mugaz gaindiko euskarazko proiektu batean murgilduta

“Zu eta ni, lanean elkarrekin” lema duen eTwinning proiektua lehenengoz euskaraz garatzen ari dira Euskal Herri osoko hainbat ikastetxe. Ikas-Bi gurasoen eta ikasleen elkartea egitasmo honetan murgildu da eta ondoko urteetan ere esperientzia errepikatzea espero du.

Kazeta|12/02/2019 13:56
Guz_ikas-bi_bilingue_prentsaurrekoa_glain_baiona_imiquelestorena03
Ikas-Biren prentsaurreko ohi bat. ©Isabelle MIQUELESTORENA

Ikas-Bi elkarteak Euskal Herri osoko hainbat ikastetxe elebidunekin batera mugaz gaindiko hamabi trukaketa antolatuko ditu. eTwinning izeneko proiektu europarraren baitan, egitasmo hau euskaraz garatuko den lehen aldia izanen da.

Ikasturte honetan proiektuaren garapenean Donibane Lohizuneko Maurice Ravel kolegioa, Basauriko Urbi institutua (Bizkaia), Atarrabiako Paz de Ziganda ikastola (Nafarroa) eta Baigorriko Jean Pujo kolegioa ari dira lankidetzan. Erraterako, donibandarrak otsailaren 14an bertaratuko dira Basaurira eta maiatzaren 16n berriz, bizkaitarrak izanen dira Lapurdira jinen direnak. Euskararen erabilera hobetzeko eta babesteko aukera ezin hobea dela erran du Ikas-Bi elkarteak.

eTwinning Europa mailako 56.000 irakaslez, 191.000 ikastetxez eta 72.000 proiektuz osaturiko hezkuntza, prestakuntza, gazteria eta kirolerako programaren atal bat dela jakinarazi du elkarteak. Bere xedeetariko bat da herrietako irakasle eta ikasleen arteko ideiak trukatzea, lankidetza sustatzea eta harremanak garatzea. Horretarako IKT-ren (Informazioaren eta Komunikazioaren Teknologia) laguntza jasotzen dute.

Bestalde, elkarteak “Emazu eskua” proiektuarekin mugaz gaindiko hamar trukaketa antolatu dituela eman du ezagutzera. Haietariko zazpi lehen mailan eta hiru kolegioan iraganen dira. Egitasmo honen bidez euskararen erabilera ez ezik, Euskal Herriko leku berri bat eta bertako kultura, historia, geografia edo jendartearen ezagutza sustatu nahi dute, baita irakasle eta ikasleen arteko harremanak landu ere.