Denbora osoko zuzendaria Mauleko ospitalean

Mauleko ospitalerako zuzendari berria izendatu dute. Michel Etchebest presidenteak eta hiriko auzapez denak atseginez hartu du albistea.

Kazeta|08/02/2019 14:00|0 comentarios
Med_hopital_maule_isabelle_miquelestorena01
Mauleko ospitaleko eraikinak arraberritzeko programa 2018an abiatu zen. © Isabelle MIQUELESTORENA

Azkenean, administrazioak Mauleko ospitalerako zuzendari berria izendatu du eta denbora osoz arituko da bere zereginetan. Bere izena otsailean jakinaraziko da eta Oloroeko ospitalearen menpe segituko du. Kargua hartzerakoan, zahar etxearen eta zerbitzu mediku orokorren artean banatzen diren 185 ohe eta 180 langile kudeatu beharko ditu. Administrazio berria antolatzearekin batera, urte honetan beste aldaketa batzuk ere izanen dira.

Michel Etchebest ospitaleko presidenteak eta Mauleko auzapezak arindua hartu du. “Azken urteetan eremu bakoitzeko arduradun bat zegoen: bat pazienteentzat, beste bat hornikuntzarako eta beste bat pertsonalerako”, adierazi du. Eskualdeko Osasun Agentziak (ARS) lurraldearen arazoei entzungor egiten zienaren sentsazioa zuen. 2013an zuzendaritza bateratua sortu zen eta Maule nahiz Oloroeko ospitaleak kudeatzeko ardurak zenbait zuzendariorderen artean banatu ziren. Biek Paueko ospitale zentroa dute euskarri gisa eta ospitale komunitate bereko partaide dira.

Eraikinak arraberritzeko programa 2018an abiatu zen. Programa honek ospitaleak sei ohe gehiago ukaiteko eta adinduei aktibitateak eta zaintza egokituak eskaintzeko ahalak emendatu beharko ditu. Lehen zatia udaberrian bukatuko dute eta 2021eko uztailean osatzea espero dute. Lanek 18,8 milioi euroko kostua izanen lukete.

Ospitaletik harago, Michel Etchebesteren ustetan “zuzendariak Xiberoko osagarrien buru izan beharko luke, osasun etxeak animatuz, Atharratzeko zahar etxea barne”. Justuki, laster diziplina anitzeko osasun etxe batek ateak ideki beharko lituzke.