Crónica
 
Jaka horiak

IRITZIA - Jaka horien mugimenduak lortu duen indarraz aritu da gaurkoan Egoitz Urrutikoetxea. Erregai zergaren kontrako jarreraz haratago bestelako aldarrikapenak indartu eta sistema bera zalantzan eman duela dio.

Egoitz URRUTIKOETXEA|17/12/2018 07:50|0 comentarios
Egoitz_urrutikoetxea
Egoitz Urrutikoetxea

Identifikatzea batere sinplea ez den jaka horien mugimendua Frantziako politika inarrosten ari da. Nehork ez zuen espero gisa bereko mugimendu sozialik. Nehork ez zuen espero sistema beraren bide lagun eta bermazale izan den klase ertainak zuela kontestazioaren sugarra piztuko.
Mugimenduaren izaerak, soziologiak, aldarrikapenen aniztasunak, mobilizazio formak, antolaketarik ez duen antolaketa ereduak, hedadurak eta lekuan lekuko errotzeak, orain arteko eskemak oro iraultzen dituzte.

Hiru aste luze behar izan ditugu gertatzen ari zen sakoneko mugimenduaz jabetzeko. Oraindik urrunetik so egiten dugu guzia, sektore gibelkoiek gehiegi kutsaturiko mugimendua delakoan. Akatsa litzateke Estatuaren eta komunikabideen zepoan erortzea, guzia soilik ekologiari loturiko enegarren kalapita gisa ezaugarrituz. Akatsa litzatekeen bezala bazter eskuinaren eraginpean garatzen den lerratze populista gisa ulertzea.

Energia zergaren aurkako oldarraldiaren iturburuan bulkada indibidualista/berekoia aurkitzen baldin bada ere, bulkada guzien baturak forma kolektibo bat hartu du, orain arte ezezaguna zitzaigun parametroetan mugitzen dena.

Lantegi txikietako langileek, zerbitzuen sektorean, komertzio gune eta ostalaritzan ari direnek,  haserrea adierazteko parada aurkitu dute jaka horien mugimenduan. Bide mozketa eta merkantzia zirkulazio guneen blokeo ekintzek sujetu berri baten agerpena eragin dute. Langile edo klase ikuspegia gainditzen duena. Klase atxikimenduak baino desjabetze sentimendu partekatuak batzen ditu. Haserre anitzen batura irudikatzen du.

Botereak ordenua behar badu, jaka horiek desordenua irudikatzen dute. Boterearen ordenamendutik kanpo daudenen mugimendua da, erabakietan hitzik ez dutenen hitza bideratzen ari dena.

Politikoki ez dira deus. Ez dute oraingoz diskurtsorik. Posizio argirik ez dutenen hitzetatik abiatuz diskurtso politiko berri bat eraikitzen ari den mugimendua da. Eta diskurtso berria itzulinguruetan, bide bazterretan eta barrikadetan biltzen direnen artean eraikitzen ari dira.
Erregai zergaren kontrako jarreraz haratago bestelako aldarrikapenak indartzen ari dira, sakonean sistemaren izaera eta bilakaera zalantzan ezartzen dutenak.

Krisia sozial gisa abiatu zena erregimen krisia bilakatzeko bidean da. Neoliberalismoaren lerratze bortitzaren aintzinean bestelako norabide bat hartzeko ustez aukera izpirik ez zenean, bat-batean, zerumuga sekulan ez bezala zabaldu da.

Hemendik aintzina gerta daitekeenaz iragarpenak nekez egin daitezke. Mugimenduaren bilakaera lekuan-lekuko indar harremanen araberakoa izanen da. Zentzu horretan, Ipar Euskal Herrian jaka horien eta bestelako mugimenduen artean sortzen ari diren sinergiak sakondu behar ditugu, justizia soziala eta trantsizio ekologikoa burujabetzaren bidean uztartuz.