Pasa den urriaren 20an, Peio Larralde hazpandarrarekin trinketeko modalitatean munduko txapelketa irabazi ondotik, Bixintxo Bilbao pilotari ziburutarra ikurrinarekin igo zen Bartzelonako podiumera. Frantziako selekzioarekin jokatuta, finalean euskal pilotariek aise hartu zituzten mendean Orlando Díaz eta Martín Cabello mexikarrak. Markagailua garbi mintzo da: 15-2 eta 15-4. Euskal bikotearekin batera, trinketeko buruz- burukoan ere Ipar Euskal Herriko Battit Ducassou gailendu zen, kasu honetan Espainiako selekzioarekin lehiatu zen Eneko Maiz gipuzkoarraren kontrakoan (15-4, 15-4).
“Plazera izan da ikurrinarekin ateratzea. Keinu hori naturala izan zen. Hemengoa naiz, nire burasoekin euskaraz mintzatzen naiz. Pilotan ikastolan hasi nintzen eta euskal kultura ainitz maite dudan gisan, frantses eta espainiar kulturei errespetua diet”, adierazi du Bixintxo Bilbaok.
Bartzelonan bukatu berri den Munduko Pilota Txapelketan, Frantziako selekzioak, trinketean eskuzko modalitatean urrea eraman du. Sari banaketako irudia hauxe da. Nahi duzuena erranen duzue, baina niri gustatu zait @FIPVOficial @fepelota @FFpelotebasque @MundialPilota pic.twitter.com/CbpUHCFCte
— Patxi Irigoyen (@patxiirigoyen) 2018(e)ko urriaren 21(a)
Frantses koloreekin jokatzera hautatu zutelarik, Bilbao lehenengoz aritu da munduko txapelketa batean. Haatik bere bizkarrean euskal identitatea agerian izan du txapelketan zehar: “Frantzia ordezkatuta ere, niretzat garrantzitsua izan da nondik natorren erakustea, euskaldun ainitz jin ziren gu animatzera. Euskal selekzioa izan balitz, plazer handiz jokatuko nuke”, erantsi du txapeldun ziburutarrak. Bitartean, kolore frantsesekin eskuratu du txapelketako garaikurra: “Domaia litzateke selekzio frantsesari uko egitea, munduko txapelketa jokatzea esperientzia bakarra baita. Aberasgarria da mexikarrekin, kubatarrekin edo espainiarrekin jokatzea eta beste jokatzeko moldeak ezagutzea”, arrazoitu du Bilbaok.
2008an, Santiago de Txileko torneo batean, Euskal Herriko koloreak harrotasunez defendatu zituela oroitu nahi izan du: “18 urte nituen, trinketean esku-huska buruz-buruko nazioarteko torneo bat zen. Plazera izan hura ere. Han ziren boliviar, mexikar, venezuelar eta argentinarrak”.
Bartzelonan bukatu berri den munduko pilota txapelketan, 60tik goiti euskal pilotarik parte hartu du selekzio frantsesa edo espainiarra ordezkatuz. Lau urteren buruan, 2022an Euskal Herrian jokatuko da munduko txapelketa. Biarritzen, hain zuzen. Izanen ote da euskal selekzioa ikusteko paradarik?