Mukuru, elkarlanean mugak hautsi nahi dituen kolektiboa

Elkarlanean norberaren eskualdea gainditzeko kolektiboa sortu du musikari talde batek: Mukuru. Egitasmoaren aurkezpena eginen dute urriaren 13an Errenterian. Mahai inguru bat egin ondotik, taldea osatzen duten musikariek kontzertua eskainiko dute.

Kazeta|11/10/2018 06:50|0 comentarios
Capture_d_e_cran_2018-10-10_a_10
Kideek antzeko beste kolektibo batzuk sortzea nahi lukete, euren antzera, elkar bultzatzeko.

Norberaren eskualdetik kanpo beren burua ezagutaraztea ez da erraza izaten musika talde eta bakarlarientzat. Horretan pentsatuz, Euskal Herriko hainbat txokotako musikariak, lagunak, elkartu egin dira kide dituztenei mugak gainditzen laguntzeko, Garako artikuluak azaldu duenez.

Mukuru izeneko kolektiboan elkartu dira horiek guztiak. Hainbat kontzertu txiki egin ostean, larunbatean izanen da aurkezpen ofiziala, Errenterian. Goizean, 11.00etan, Mikelazulo Kultur Elkartean “Musika, zergatik kolektiboki kolektiboak” mahai ingurua egingen dute. Bertan parte hartuko dute Bidehuts musika zigiluko, Erraiak zigiluko, Musikazuzenean kontzertuen atari digitaleko eta Taupaka sortzaileen elkarteko ordezkariek. Horiek batzen dituzten gauzen eta esperientzien berri emanen dute.

Arratsaldetik aurrera, berriz, kolektiboa osatzen duten musikariek kontzertua eskainiko dute. 18.00etan, Mikelazulon, Isuo eta Kerman, Nigara Zuek, Peru Galbete, Hatxe, Paxkal Irigoyen, Iturria eta Seitanek beren kantu sorten aukeraketa bat egingo dute. Gauean, berriz, 22.30ean Niessenen emanaldia eskainiko dute Txost!, Klak!son eta Muskulo taldeek.

Batera, askoz hobeto

Kolektiboko kideetako Idoia Hernandezek adierazi zuenez, Gipuzkoa, Nafarroa eta Iparraldeko musikariak elkartu dira. Lagunak dira eta euren sorkuntza lanak aurrera eramaterako babesa ematen diote elkarri. Arlo teknikoan ere elkarri laguntzen diote.

"Filosofia bati ere jarraitzen diogu. Gehienak elkarte edo gaztetxe baten inguruan gabiltza. Gauzak beste era batera egin nahi ditugu. Gure musika ere ez da definitzeko erraza", azaldu zuen bozeramaileak. Mukuru zigilu moduko bat da, baina artistak ez ditu ezertara behartzen.

Orain arte hiru kontzertu egin dituzte: uztailean Elizondon izan ziren Kaskezur eta Paxkal Irigoyen. Era berean, azken hau Txost!-ekin batera aritu zen Itsasun ekainean. Antzuolan ere egin zuten emanaldi bat, non hainbat talde eta bakarlarik hartu zuten parte.