San Izpirituko auzotarrak arranguraturik

Joan den agorrilaren 27an merkatari batek jasandako erasoaren ondotik, Baionako San Izpiritu auzoko ehun bat herritar karrikan batu ziren irailaren 1ean, egun oroz jasaten duten segurtasun eza salatzeko. Auzapezak hartutako neurriez harago, epe luzerako aterabideen esperoan dira eta 400dik gora izenpedura bildu dituzte jadanik.

Kazeta|05/09/2018 07:10|0 comentarios
Capture_d_e_cran_2018-08-30_a_11
Auzapezak neurri zehatzak hartu izan ditu auzoan.

Karriketan prebentzio eta hezitzaile gehiago nahi dituzte. Hau da, Baionako auzo honetako merkatari, erabiltzaile eta auzotarren taldeak larunbatean egindako eskaera. Gisa horretan, egun oroz gertatzen diren eraso eta gizabide gutiko jokabideak apalduko direla uste dute. Jean-René Etchegaray auzapeza elkarretaratzera bertaratu zen eta bere azalpenak lasaitasun ttipi bat ekarri zien.

Auzapezak neurri zehatzak hartu izan dituela oroitarazi zuen. Hauen artean, auzoan poliziaren presentziaren emendatzea. Honekin batera, “Chez Bernadette” ostatuaren ordutegia mugatzeko dekretu bat sinatu duela erran du auzapezak eta orain arratseko 20:00etan hetsi behar ditu bere ateak. Halere, prefetari ostatu hau behin betiko hesteko prozedura has dezan galdegin dio. “Egoera honetaz 2011n hasi ginen informatzen eta uste dut erreakzioa berantegi heldu dela”, azaldu du bertako auzoa den Pascalek.

Ildo horretan, auzoko eraikin bateko bizilagunek “31 en folie” kolektiboa osatu dute eta izenpedura bilketa bat jarri dute abian. Elkarretaratzean ezker eskuin ibili zen testua eta 400 lortu dituzte jadanik. Kolektibo honek gaueroko harrabotsa, narkotrafikoa, prostituzioa eta bandalismoa salatzen ditu. Are, hainbat auzotarrek erran dutenez, beldur dira haien etxetik irteteko.

“31 en folie” kolektiboarentzat neurri polizialak puntualak dira eta ez dituzte harrabotsak sortzen dituen eragozpenak apaltzen. Prebentzioa eta karriketan hezitzaile gehiago izatea dira haien aldarri nagusiak eta erran dutenez, “hauek aurrekontuen arrazoiengatik murriztuak izan ziren departamenduaren aldetik”. Izenpedurak biltzeko osatu duten testuan, halere, auzoaren aberastasun kulturaniztuna eta bizikidetzarako elkarte, artista eta merkatarien inplikazioa goraipatu dituzte. Talde honek iragarri du espazio publikoa errebindikatzeko eta etxetik irteteko beldurrik ez izateko geroari begira beste bilkura bat eginen duela.