Baionako Herriko Etxeak Euskoak defenditzeko borondatearekin segitzen du. Dei Auzitegiak Paueko Administrazio Auzitegiaren epaia deuseztatu eta, afera urrunago eramatea erabaki du Jean-René Etchegaray hiriko auzapezak. Tokiko monetarekin ordaintzeko ahalmena lortzeko xedez, berehalako prozeduraren kontra Estatu Kontseiluan helegite bat aurkeztea erabaki du, Sud Ouest atariak azaldu duenez.
Aferaren mamia aztertu bitartean, prefekturak berak berehalako auzia abiatu zuen elkartea eta Herriko Etxearen arteko akordioa lehenbailehen bertan behera uzteko. Azken mementora arte itxoin du Herriko Etxeko abokatuak Dei Auzitegiaren erabakiaren kontra errekurtsoa aurkezteko. Baionako Herriko Etxeak Estatu Kontseiluak bere alde jotzea espero du.
Oroitarazi behar da, iaz abiatu zen afera dela. Martxoaren bukaeran euskoaren kontrako bigarren salaketa bat aurkeztu zuen Pirinio Atlantikoetako prefetak. Paueko Auzitegi Administratiboa Herriko Etxearen alde agertu eta, Dei Auzitegiak, arrazoi eman zion Estatuari.