Topagune bat Barkoxeko Maskaradak marrazteko

Marrazkeraz Hego Euskal Herriko marrazkilari elkarteak eta Uztaro Ateleriak apirilaren 1ean Barkoxen iraganen diren Maskaradak grafikoki islatzeko topagunea antolatu dute.

Kazeta|30/03/2018 08:00|0 comentarios
Image
Goizean eta arratsaldean elkartuko dira parte hartzaileak. ©Uztaro ateleria eta Marrazkilari Euskaldunon Topagunea

Ezohiko deialdia luzatu dute Uztaro Ateleria taldea eta Marrazkeraz Hego Euskal Herriko marrazkilari elkarteak. Ekimeneko parte hartzaileak Barkoxen iraganen den Maskarada marrazteko topatuko dira, igandean.

Egunean zehar herritik gaindi ibiliko dira marrazkilariak. Beren begi aitzinean kokatuko den oro paperean islatzeko parada izanen dute.

Antolatzaileek bi hitzordu finkatu dituzte. Goizean, 10.30ean Barkoxeko plazan elkartuko dira. Arratsaldean, berriz, 15.00etan toki berean ikusiko dute elkar. Marrazkilari profesional zein hasi berriei zuzenduko ekimena dela zehaztu dute.