UEUk bost ikastaro eskainiko ditu Baiona eta Bidarten

Udako Euskal Unibertsitateak hogeita hamar ikastaro eta jardunaldi antolatuko ditu; horietako bost proposatuko ditu Baionan eta Bidarten. Energia eta sare elektrikoak, hezkuntza, kultura eta sormena ikastaroen gaiak izanen dira.

Kazeta|01/06/2016 10:35|0 comentarios
Img_1475
Irati Iciar UEUko Udako Ikastaroetako arduraduna eta Hatitza Camblong irakasle eta energia eta sare elektrikoen jardunaldien arduraduna.

"Anitza", aurten Udako Euskal Unibertsitateak (UEU) antolatuko dituen ikastaroen leloa da. Erakundeak proposatzen dituen jardunaldien gaiak, pertsonak, formatuak eta tokiak anitzak direlako. Uda honetan UEUk hogeita hamar ikastaro eskainiko ditu eta horietako bost Ipar Euskal Herrian iraganen dira.

UEUko ikastaroak "jakintza eta aditu euskaldunen topagune dira", jardunaldien arduraduna den Irati Iciarrek azaldu duenez. "Udako Ikastaroen plaza ikasi, eztabaidatu, lan egin eta ideiak trukatzeko foro ezin hobea da, eta guztiok bertan parte hartzera gonbidatzen zaituztet", erantsi du.

Unibertsitateak aurtengo eskaintza apaltzea erabaki du. Azken urteetan berrogei ikastaro antolatzen zituen, "baina aurten eskaintza trinkotu eta optimizatzea" erabaki du. Iciarrek aipatu duenez, ehun proposamen jaso dituzte; "aukeraketa zaila izan" dela nabarmendu du.

Aurtengo ikastaroak hiru formatu ezberdinekoak izanen dira. Alde batetik, ikastaro berezituak, horietan parte hartzeko aitzinetik jakintza maila bat eskatuko die parte hartzaileei. Bestalde, dibulgazioko ikastaroak, jakintza maila zehatzik gabekoak eta azkenik, jardunaldiak.

Energiak, hezkuntza eta kultura

Uztailaren 6 eta 7an "Energia eta sare elektrikoak: egoera eta etorkizuneko estrategiak" lelopean Haritza Camblong irakasleak jardunaldia proposatuko du Bidarteko Estia Ingeniaritza eskolan. Energia elektronikoen egoera Euskal Herrian eta alor horietan garatzen ari diren ikasketa eta proiektuak aipatuko ditu, besteak beste.

Uztailaren 7 eta 8an "Mindfulness eta Arreta Osoa hezkuntzan" ikastaroa eskainiko du. Egun berdinetan, "Guraso, hezitzaile eta haurren elkar ulertzea: zigorrak, xantaiak eta mehatxurik gabeko harremanak" izenburuko jardunaldia proposatuko du. Kulturaren arloan, interesatuek "Eta kultura autodeterminatuko balitz?" gaiari buruz hausnartuko dute uztailaren 6 eta 7an. Bukatzeko, "Proiektuak garatzeko metodologia berritzailea, diseinu pentsamenduaren (Design Thinking) hastapenak" lelopean ikastaro berri bat antolatuko du.

Arduradunak azaldu duenez, izena emateko epea irekia da eta ikastaroa hasi baino aste bat lehenago izena emaiten ahalko da. Informazio gehiago ikusgai dago webgunean.