Heldu den uztailaren 19an tradizioa, elkartasuna eta bestak topo eginen dute Elizondon. Baztandarren biltzarrak 52. urtemuga ospatuko du eta horretarako beste behin ere, ibarreko hamabost herriek karriketan gaindi beren karrozekin desfilatuko dute. "Baztanen euskara barra-barra" lelopean, tradizio koloretsua garaile izanen da eta obren bidez batzuek beren aldarrikapenak ere egiteko parada izanen dute.

Aurtengo edizioan ziurrenik ere, iragan urteko ekimena herritar anitzen buruan egonen da. Uholdeek ondorio handiak utzi zituen Baztanen, baina herrien eta biztanleen elkartasunari esker egoera konpontzen jakin zuten. Nahiz eta uda erdiko ospakizuna zalantzan jarria izan, inoiz baino arrakastatsuago izan zen; batez ere bertan sentitu zen emozioari esker. Halaber, herri bakoitzean egindakoaz gain, lagun talde guziak elkartu eta karroza bakarra egin zuten. "Auzolana, izerdi tantek sortutako elkartasun uholdea" lelopean, obrak eskutik harturik elgarren artean egindako lana gogoratu zuen.

Mutildantza eta bazkaria

Goizean goizetik, txistuek Elizondoko karrikak alaituko dituzte. Urtean zehar egindako lana erakusteko, karrozek herria zeharkatuko dute eta herriko etxeko plazan Mutildantza eginen da. Ondotik, Axular karrikan artisautza eta tokiko produktuak erosteko parada izanen da.

Urtero bezala, eguerdian herriko bazkaria iraganen da merkatu plazan eta bertan desfilearen sariak banatuko dira.