Zurrumurruak aspalditik entzun dira sare sozialetan. Arazo ekonomikoengatik, Biarritz Olympique eta Aviron Bayonnais errugbi taldeak fusionatuko lukete. Baina mementoz ez da ezer baieztatua izan. Maiatzaren 13an, beren iritzia entzunarazteko helburuarekin, Baionako jarraitzaileak klubaren lehendakariarekin elkartuko dira.
Ipar Euskal Herriko errugbiaren etorkizuna zalantzan dago. Bi taldeen zuzendaritzak oraindik ez du ezer baieztatu. Gainera, dirudienez maiatzaren 12an Komertzio Ganbarak ez zuen eskakizun berezirik jaso.
Dirudienez Biarritz Olympique eta Aviron Bayonnais errugbi taldeen arazo ekonomikoak fusioa gauzatzea behartuko lukete. Sud Ouest egunkariaren arabera, Aguilerako estadioko jokalariek azken bi hilabete hauetan soldatak berantean errezibitu lituzkete. Gisa berean, Baionako taldeak 2.2 milioi euroko defizita sufrituko luke.
Denbora bukatzen
Top 14aren bukaera baino lehen ez da ezer argitaratuko. Bi klubak serioski aurreikusten ari dira etorkizun amankomun bat, baina akziodunen asanbladak azken hitza du. Hala ere, erabaki bat hartzeko denbora bukatzen ari da.
Komunikabidearen arabera, ekainaren 30a arte dute afera eztabaidatzeko. Data horretan 2015-2016 denboraldiaren egutegia finkatzen da. Mementoz, hausnarketak aitzina pausuak eman dituzten arren, arlo administratiboan aitzinamenduak ez dira agertu.