Goizeder TABERNA

Kanboko lurrak: erabaki zahar-berriak nahasmenaren erdian

Kanboko herri kontseiluak Itsasuko bidean den errepide ondoko lur-eremuaz harturiko erabaki bat gibelera botatzeko erabakia hartu du. Hainbat gorabeheraren ondotik, gehiengoaren arabera lehen bozka litzateke egokia.

Iazko uztailaren 23an, Kanboko Herriko Etxeak herriko bi lur-eremu saldu zituen. Bob EDME
Iazko uztailaren 23an, Kanboko Herriko Etxeak herriko bi lur-eremu saldu zituen. Bob EDME

Lehenik, herriko lur batzuk herriko hautetsi bati saldu zizkioten. Horri kontra eginik, salmentari buruzko erabaki berri bat hartu behar zen, baina kasu horretan, esleipenean hautetsi bat ageri zen nahasturik eta bere lehiakideak interesen hartze ilegal baten susmoa hartu zion. Estatuak bigarren deliberazioa bertan behera gelditzeko galdegin zuen. Ondorioz, lehen erabakira itzuliz, Orpi higiezin agentzia jabetzarekin gelditu da. Dosierra Kanboko Herriko Etxean uztailaren 4an ostegunarekin izan zen eztabaidatua.

Mushdehalsuenborda izena du lur-eremuak, Puyodebat txokolategi museotik hurbil dena. 2.102 metro karraturekin, 2018ko uztailean Orpi higiezinari saldu zioten 210.000 eurotan, deialdiri publikorik egin gabe. Bere zuzendaria Yolande Huguenard da, gehiengoaren hautetsia. Salmenta hori zalantzan jartzen duen Nahi Dugun Herria oposizioko taldeak ohartarazita, Baionako suprefetak esku hartu zuen, hastapenean erabaki hori baliogabetuz.

Agour eta Pages Vedrennes

Dosierra martxoaren 11ko herri kontseiluan tratatu zen berriz. Ondotik batzorde bat sortu zen, kontratua esleitzeko irizpideak finkatzeko. Hiru hautagai presentatu ziren: Orpi higiezina, Pascal eta Setoain medikuak eta Agour/Pages Vedrennes enpresak. Heletako gasna ekoizlearen eta Izarraren banatzailea den likoregilearen arteko aliantza hautatu zen. Agour eta Pages Vedrennes enpresek tokiko produktuen salmenta puntu bat plantan ematea zuten helburu.

Alta, apirilaren 29an, osasun arloko hamabost profesional bilduko lituzkeen medikuntza gune bat sortzeko nahia duten Pascal eta Setoain medikuek kontrakotasun eskaera bat presentatu zuten, martxoaren 11ko erabakia bertan behera geldi zedin exijituz. Haien ustez, martxoaren 11n Peio Etxeleku hautetsiak parte hartu ondotik, Agour enpresaren arduradun ere badenaren hautagaitza ez litzateke arauei atxikia.

Edozein gisaz, gehiengoko hautetsien arabera, arrangura hauek guztiek ez dute funtsik. Izan ere, aurten zendu den Bernadette Jougleux auzapez zelarik, iazko uztailaren 23an bozkatu zen deliberazioarekin asmatu zutela diote. Christian Devez auzapez berriak segurtatu du orduko erabakia zuzena zela eta baita Oussimendiako lurrei dagokiona ere.

Denborak kontra jokatu izanen luke

Nahasketa hasi zen memento berean, hots, uztailaren 23ko hartan, azken lur-eremu horren inguruko beste kasu bat atera zen. Durruty/In´Sitom kanboar enpresari saldu zioten. Oposizioko talde abertzaleak kasu hau ere salatu zuen. Baina afera honetan, denborak legearen kontra jokatu du. Hautetsi hauen ustez, deliberazioa lau hilabeteren buruan ezeztatu behar zen, nahiz eta gehiengoak ez duen irakurketa horrekin bat egiten. Azkenean, deialdirik egin gabe, lurra Durruty-ri saldu zioten.

“Bi lur-eremu hauekin erabateko huts egite bat ikusten ari gara”, erran zuen Argitxu Hiriart-Urruty oposizioko buruak, herriko ondare bat manera honetan galdu izana deitoratzen zuen memento berean. “Domaia dena da gune gormant bat nahi genuela”, erantzun zion Pascale Lespade auzapezaren axuantak.

Auzapezak eztabaida fite hetsi zuen, “lehen erabakia perfektua izan zela” baieztatuz. Nathalie Ayçaguerrek jabetzaren estimazioa hastapenetik okerra izanen litzatekeela erantzun zion. “Hori zure ikuspegia da” izan zen auzapezak erran zuen gauza bakarra, hautetsi abertzaleak ideki nahi zuen hariari muzin eginez.