Anaiz Aguirre Olhagaray

Olivier Dugrip: “Kezka hauek izateko ez da arrazoirik”

Atzo, ekainaren 26an, Bordeleko Akademiako errektorea Donapaleuko Chemin-Bideak espazioan konferentzia gelan zelarik, euskarazko hezkuntzaren aldeko elkarretaratzean ziren pertsonak barnera sartu ziren “hemen gaude euskararen alde” oihukatuz. Bilkuraren ondotik, errektoreak MEDIABASKek luzaturiko galderak erantzun zituen.

Olivier Dugrip landa-eremuan eskolari buruzko mahai-inguru batera jin zen Donapaleura. ©Guillaume FAUVEAU
Olivier Dugrip landa-eremuan eskolari buruzko mahai-inguru batera jin zen Donapaleura. ©Guillaume FAUVEAU

Zer gertatzen da Ainhoako eta Irisarriko eskoletako murgiltze hezkuntza proiektuekin?

Olivier Dugrip: beti besapean dugun dosierra da, horrela adierazi baldin badaiteke. Tokiko hautetsien eskaerak eta familien atxikimendua apuntatu ditut. Azaldu dudan bezala, idekiera hauek biziarazteko lehenik errekurtsoak izanen ditugula segurtatu nahi dugu. Egiaztapen hauek egin eta ondotik, bi aterabide izanen dira. Edo orain posible da eta heldu den eskola sartzean eginen dugu, edo denbora gehiago hartzea zuhurragoa izanen da, auzapezei eta burasoei eskatuko niekeelarik urte bat gehiago itxoitea idekiera hauek egin aitzin.

Beraz, ateak ez daude guztiz hetsirik?

Atea ez dago hetsirik, nehoiz ez baita egon. Sinpleki, baliabide arazoak ditugula oroituko diet, ez aurrekontu baliabideak, giza errekurtsoei dagozkionak baizik. Euskara mintzatzen duten irakasleak eskas ditugu eta euskara hitz egiten duten irakasle taldea dugula segurtatu behar dugu hezkuntza sistemaren garapena ikusi baino lehen.

Lizeoetako euskarazko lau oreneko hautazko klaseak mantenduko al dira?

Bai, absolutuki. Baliabideak emanak dira, beraz, orain arte bezala lizeoetarako erreformarekin segitzen dugu, lurraldeko establezimenduetan.

Adibide gisa, irakasle elkarteentzat erreformak euskararen balioa gutitzen du latinarekin alderatuz gero. Zer diozu?

Ministroak antzinako hizkuntzak eta kulturak balioan jartzea erabaki du, baxoan koefiziente altuagoa dutelako. Errealitate bat da. Horrek ez du erran nahi eskualde hizkuntzek balioa galtzen dutenik. Lizeoetako erreforma koadroan azken hauek beren lekua dute. Gaur goizean gogora ekarri dut eskualde hizkuntza ohiko hizkuntza bizi gisa kontsideratzen dela, atzerriko hizkuntzen maila berarekin. Beraz, ikasleek B edo C hizkuntza bizi titulu bezala har dezakete. Hezkuntzaren berezitasun gisa hautatu ahalko da.

Ikasleek baxoko azterketetan historia-geografia, zientzia irakaskuntza eta ahozkoaren zati bat euskaraz egiteko aukera izanen dute. Horrela, erreformaren testuinguruan, eskualdeko hizkuntzak pisu handiagoa du, froga kopuru handiagoan. Ondorioz, kezka hauek izateko ez da arrazoirik.

Zientzia-azterketak euskaraz egin ahalko direla segurtatzen duzu?

Bai. Orain arte baimen berezi batek matematikak euskaraz pasatzea permititzen zuen. Lizeoetako erreformarekin, matematikaren irakaskuntzarik ez da gehiago izanen, baina bada zientzia-irakaskuntza bat, aldi berean matematikez, zientziaz eta fisika-kimikaz arduratuko dena. Ondorioz, zientzia-irakaskuntzaren koadroan hedapen bat izanen da.

Seaskak uste du eman zaizkion hamar postuak ez direla aski. Zer diozu?

Seaskaren euskarazko hezkuntzak garapen garrantzitsua ezagutu du. Jakina, garapen hau baliatuko dugula espero dut, etorkizunerako prestatuak izateko eta lurralde honetan euskararen garapena babesteko. Aurtengo urterako, hamar postu gehigarriak Estatuarentzat ahalegin garrantzitsua dira. Neurria hartzea espero dut. Hauek aitzineko urteetan sorturiko postuei gehitzen zaizkie. Iraupenaz bilana egiten dugunean, hau positiboa da. Seaskarekin euskararen garapenaren alde lurralde honetan egin dugun lan bikainaz pozik egon behar dugula uste dut.