Kazeta

Hendaia Biltzen taldea 2020ko hauteskundeen dinamikan murgildurik

Heldu den herri eta Elkargorako hauteskundeei begira jarri dira ezkerreko abertzaleak. Atez ate egindako inkesta baten ondotik, lau erronka identifikatu eta horiez guziez eztabaidatzeko ekainaren 22an Udal Jarduera antolatu dute.

2014ko hauteskundeetan Hendaia Biltzenen zerrendak bozen %12,56 lortu zuen lehen itzulian. © Guillaume FAUVEAU
2014ko hauteskundeetan Hendaia Biltzenen zerrendak bozen %12,56 lortu zuen lehen itzulian. © Guillaume FAUVEAU

Hendaia Biltzen taldea heldu den urtean eginen diren herri eta Euskal Elkargorako hauteskundeak prestatzen hasia da jadaneko. Prentsaren aitzinean ezagutarazi zituzten dinamika horren nondik norakoak. Momentukoz, atez ate inkesta bat egin dute herrian barna eta bildutako iritziekin lau erronka identifikatu dituzte: klima, soziala, hizkuntza eta kultura, eta erronka demokratikoa.

Behin ondorioak bildurik, hurrengo urratsa horiek presentatu eta Hendaia Biltzen taldearen baloreekin bat egiten duten hendaiarrekin eztabaidatzea izanen da. Hori ekainaren 22an larunbatarekin izanen da, goizeko 10etatik goiti Autoportu gelan antolatu duten Udal Jarduera izeneko ekimenean.

Sufragio unibertsala eta Lurralde Kolektibitatea

Hauteskunde dinamikaren presentazioan ezagutarazitako erronkez aritu ziren taldeko kideak. Erraterako, ekologiari dagokionez, Laetitia Navarron irakasleak ohartarazi zuen klimaren desafioak gai ainitz hunkitzen dituela, horien artean, mugikortasunean autoen murrizketa eta laborantza lurren mantentzea.

Sozial arloari dagokionez, “kolektibo guzien eskubideen berdintasuna lantzen dugu” erran zuen Ixa Eguiazabal erizainak, bereziki diskriminazioan diren emazteei eta LGBTI kolektiboko jendeei erreferentzia eginez. Baztertuak diren pertsonak ere izan zituen hizpide eta gazteen eremuan, Hendaian gaztetxea ukaitea aipatu zuen xedeen artean.

Xabier Manterola animatzaile soziokulturalak hiru hizkuntzen erabilera jarri zuen balioan, eta lurraldean mintzatzen diren hizkuntzen aldeko parioa eginik ere, euskararen irakaskuntza azkartzeko beharra aipatu zuen, “hori baita hizkuntzarik hauskorrena eta gutxien balioztatua”. Gisa horretan konplexurik gabeko hizkuntza politika defendatu zuen.

Azkenik, erronka demokratikoaz Jose Rodriguez merkatariak udal jardueran herritarren parte hartzea aipatzearekin batera, Euskal Elkargoko hautetsiak bozka bidez hautatzea proposatu zuen. “Estatutu berezia duen Lurralde Kolektibitatea lortu nahi dugu”, erantsi zuen.