Kazeta

Euskal mitologia transmititzeko ikastaro didaktikoa Donostian

Hik Hasik Donostian uztailaren 2tik 4ra antolatu dituen Udako Topaketen barnean, Ixabel Millet euskal mitologian eta didaktikan adituak formazio bat eskainiko du.

Ixabel Milletek euskal mitologiari buruzko ikastaldiak ematen ditu. @IxabelMillet
Ixabel Milletek euskal mitologiari buruzko ikastaldiak ematen ditu. @IxabelMillet

Ixabel Millet kontalari, idazle, formatzaile eta Hendaiako Bi´arte elkarteko zuzendariak uztailaren 2an, 3an eta 4an euskal mitologiari buruzko ikastaro didaktiko bat eskainiko du Donostian. Hik Hasi egitasmo pedagogikoak antolaturiko Udako Topaketen barnean eginen den hiru eguneko saioa Euskal Herriko Unibertsitatean (EHU) iraganen da, goizeko 9:00etatik 14:00etara.

Ikastaroan euskal mitologiaren inguruan interesa duen edonork parte har dezake. Mitologia lantzerakoan, pertsonaiak ezagutzen baditugu ere, gehienetan sakabanaturik ageri dira. Ikastaroaren bidez, euskal mitologiaren antolamendua eta irakurketa sinbolikoa landu nahi dira. Helburu hori lortzeko teoria nahiz praktika uztartuko ditu Ixabel Milletek, informazio zehatzarekin eta ariketen bidez.

Udako Topaketa hauetan orotara 35 ikastaro eskainiko dira. Izena emateko epea maiatzaren 31n bukatuko da. Hik Hasiren web ataritik edo (0034) 943371408 telefono zenbakira deituz egin daiteke.