Kazeta

Abian da Baigorriko kulturaldia

Nafarroaren Eguna apirilaren 28an ospatuko da Baigorrin eta aitzineko egunetan Baxe Nafarroako herrian hainbat kultur ekitaldi programatu ditu Basaizea elkarteak.

Nafarroaren Eguna apirilaren 28an ospatuko da.
Nafarroaren Eguna apirilaren 28an ospatuko da.

Mugaz gaindi nafar guziak elkartzeko urteroko hitzordu garrantzitsua da Nafarroaren Eguna. Aurten apirilaren 28an ospatuko da, ohikoa denez, Baigorrin. Egun horretako egitaraua goizetik hasiko da, besteak beste, dantzariak, ziganteak, txarangak, desfilea eta bertsolariak izanen direlarik. Bazkariaren ondotik, Izaki Gardenak, Eskean Kristo, Diabolo Kiwi eta Holako Deluxe taldeen kontzertuak iragarri dituzte.

Apirileko azken igandeko egun handiaren atarian, Basaizea elkarteak antolaturiko “Baigorriko kulturaldia” abiatu da. Apirilaren 12an ostiralarekin Alduden eman zitzaion hastapena “Kintoan barna” mugaz gaindiko proiektuen inguruko mintzaldiarekin. Saioi horretan Baigorri eta Iruñearen arteko 13 eragile biltzen dituen proiektua eman zuten ezagutzera. Besteren artean, bertan parte hartu zuten Mizel Oçafrain Bankako auzapezak, Mikel Gastesi Esteribarrekoak, Michel Ernaga Urepelekoak eta Betti Bidart Baigorriko hautetsiak.

Apirilaren 17an berriz, “Emazteak euskal dantzetan: gezur baten historia” izenburupean mintzaldia izanen da Baigorriko Bixentenea gelan. Arratseko 20:00etatik goiti Oier Araolaza dantzari eta ikerlariak hartuko du hitza. “XX. mendean zabaldu zen ideia bat esaten zuena emakumeek euskal tradizioan ez dutela dantzatu izan. Gezur hori dokumentatu eta gezurra dela frogatzeaz gain, gezur hori noiz eta nola sortu zen ikertu dut”, errana du Araolaza berak.

Azkenik, Nafarroaren Egunaren bezperan, hots, apirilaren 27an, zine-kontzertu berezia iraganen da Plaza Xoko gelan, arratseko 21.00etan. 1921ean Charlie Chaplinek egindako "The Kid" (haurra) filma proiektatuko da, egileak berak konposaturiko musika Xare Orkestrak zuzenean joko duen bitartean.