“Gizarte zibilak hitza izan dezan dago Garapen Kontseilua”

Philippe Mayté Euskal Herriko Garapen Kontseiluaren behin-behineko presidentea da. Berriki izan diren dimisioez eta gidatzen duen erakundeak egiten duen lanaz mintzatu da.

Goizeder Taberna|12/04/2019 06:55|0 commment
Philippe-700x490
Philippe Mayté, Euskal Herriko Garapen Kontseiluko behin-behineko presidentea.

Duela guti Euskal Herriko Garapen Kontseiluaren presidente kargua hartu duzu. Trantsiziozko epe arrunt bat al da?

Hori da. Martxoaren bukaeran Caroline Phillipsen dimisioaren ondotik zuzendaritza batzorde bat genuen. Ordura arte lehen presidenteordea nintzen eta bulegoak urratsa egiteko galdegin zidan. Presidentetza bat segurtatzeko ez atzean gelditzea deliberatu nuen, baina behin-behinekoa izateko baldintzarekin. Hautu hori bulegoari ez ezik, zuzendaritza batzordeari ere komeni zitzaion, gisa horretan bere buruari denbora muga bat jartzeko. Haatik, gauzak egonkortzen lagunduko du, ondoko presidentetza eta zuzendaritza oinarri on batetik abia daitezen.

Denbora laburrean hiru dimisio izan ziren. Zeintzuk dira arrazoiak?

Dimisioak Caroline Phillips presidente ohiak, Françoise Pautrizel diruzainak eta Isabelle Charriton diruzainaren axuantak eman zituzten. Ez naiz xehetasunetan sartuko, hori ez baitago nire buruari ezarri diodan misioaren izpirituan. Bulegoan hainbat ibilmolderekiko azterketa ezberdinak izan genituela erranen nuke. Guziok ibilmoldea gure egiten genuen, baina ezinbestez ez ginen ados analisiarekin eta hartzen ziren erabakiekin. Honek hiru pertsona hauek joatea ekarri zuen. Egungo bulegoaren erdia baino gehiago joan den uztailean sartu zen Garapen Kontseiluan. Ez ginen instantziarekin eta egiturarekin identifikaturik. Gure asmoa ez zen egun egitera goazena egitea, hots, Garapen Kontseilua berrabiatzea.

Zuen funtzioetara itzulita, hautetsiek hartu behar dituzten erabakietan gidatzeko eta aholku emateko al zaudete?

Gizarte zibilak hitza izan dezan gaude, horretarako kontsultarako espazio bat egon dadin. Ekintza publikoari loturiko batzordeetan ahalik eta begirada zorrotzena izatea da gure papera. Hautetsiei gure ikuspuntua ematen diegu, haiek duten ikusmoldea aldatzeko. Gizarte zibileko partaide guzien hitza ekartzen dugu. Aitzineko presidentetzak egindakoari segida ematen diogu.

Lehengo larunbatean klimari loturiko foro bat antolatu zenuten. Ondoriorik atera al duzue?

Ez oraino, bi urrats dituen hitzordu baten lehen zatia zelako. Euskal Elkargoak eta Garapen Kontseiluak antolaturiko programa bat da. Lehen egun honetan, diagnostikoak partekatu genituen, klima planerako aldeko eta kontrako aldagaiak aztertzeko. Bigarren eguna ekainean antolatuko da, Elkargoak gauzatu beharreko ekintza zehatzekin. Bertan izan ziren aktoreek egun honetan parte hartzeko interes erreala dute.

Etxebizitza plana ere garatzen ari da. Zuen hondar alea jarri al duzue?

Bai, ekarpen bat egin genuen. Batzorde batek hilabeteak daramatza lanean. 30-40 lagun bildu dira zenbait tailerretan. Etxebizitza planak etapa ezberdinak dituenez, hau lehen ekarpen bat da. Ipar Euskal Herriko herritar guzientzat etxebizitza plan bat ukan behar dugu.

Zeintzuk dira hurrengo lanak?

Euskal Elkargoaren lan egutegia segitzen entseatzen gara. Hiri garraioaren planaren gainean gaude. Euskararen inguruko elkar aditze lan bat egiteko ere galdegin zaigu, Elkargoak behar duen hizkuntza politikarako. Genero berdintasunaren inguruan lanean gabiltza. G7aren lurralde balioztatze batzordeko kideak gara ere. Ipar Euskal Herriarekiko gure pertzepzioa ongi ulertua izatea nahi dugu, lurraldearekiko dauden klixeetatik atereaz.

Gizon eta emazteen arteko berdintasunerako foroaren ekimenean izanen zarete?

G7aren barnean, hau da proposatu zaigun gaietako bat. Halere, ez naiz horri buruz hitz egiteko pertsonarik egokiena. Arrazoi profesional eta familiarrengatik, mugikortasun batzordeko kide eta ekainera bitartean funtzioetan den presidentea naiz.

Ekainean biltzar nagusia izanen da.

Presidentea hautatuko duen zuzendaritza batzorde bat izanen da, eta ondotik, biltzar nagusia.