Eski-guneak elurraren menpe

Sasoi hastapena ez dute aldekoa izan mendiko kirol eremuek, baina estalki xuria oraindik gainean duteno ez dira bilan txarrik egitera menturatzen. Alderantziz. Erreportaia hau Euskal Hedabideen - Kazeta, Euskal Irratiak, Herria, Kanaldude eta Ipar Euskal Herriko Hitza - artean elkarlanean osatutako dosier baten parte.

Goizeder TABERNA|28/03/2019 08:25|0 commment
La_pierre_st_martin_3
San Martin Harriak familientzako gunea izatearen fama du. © MEDIABASK

Azarotik aitzina, goizero zerua arakatu ohi dute eski-guneetan lan egiten dutenek. Haien jarduera eguraldiaren, eta batez ere elur mailaren menpe dago. Bukatzen ari den aurtengo sasoiak berriz ere arau hori gogorarazi die, izan ere, kaskarra izan baita abiatzea. Otsailaz geroztik eskiatzeko baldintzak paregabeak direnez, oraindik ikustekoa da aurtengo bilana azkenean baikorra izanen den.

Gourette izan da Biarnon elur eskasagatik gehien sufritu duen gunea, urtarrila erditsura arte ez baitzegoen maila aski onik igogailu mekanikoak ibilarazteko. Aterbetzeko egituren %20 baizik ez zen bete. Hala ere, Turismo bulegoko zuzendari den Christophe Bador kontent ageri da. "Otsailean eta martxoan elurra eta eguzkia izan ditugu, sasoi ona egin dugula erran dezakegu", baieztatu du. Ez da ohikoa martxoaren 20a iragan eta eskiatzeko guneak %100 elurtuak izatea.

Nahiz eta abenduko garaia gogorra izan den, orokorrean, Biarnoko elur-guneetako eragile ekonomikoen %89 pozik agertu da otsaileko emaitzaz, Turismo Erakargarritasun eta Garapen Agentziaren arabera. Haatik, profesionalen %66k bilan txarragoa egiten du urtarrileko aktibitateaz. Tokiko bezeroak eskiatzera joan direla ere argiki erraten dute, aldiz, Frantziako Estatutik kanpokoak gutiago izan direla ere bai.

Elur-guneak aisialdirako izateaz gain, lanerako ere badira. Zuzeneko lanpostuen eta zeharkakoen artean, ibarretako jende anitz bizi da horretaz. © MEDIABASK

Otsaileko bakantzetan, lau astez, 970.800 eski egun saldu ditu Pirinio ipar mendebaldeko zortzi gune biltzen dituen N’PY markak, eta horrekin %13 igo da marka 2018arekin konparatuz. Eguberriz, aldiz, iaz baino %40 gutiago kontabilizatu ditu. Holakoetan, gainera, elur artifiziala ekoiztu ohi dutenez, gastuak emendatu daitezke.

Elurra lehen baino berantago

Askotan, sasoiaren hasiera elur malutarik ikusi gabe iragaten da. Azken urteetan, hala gertatu zen 2012an, 2016an eta ondoko urtean. Elurra lehen baino berantago heldu denaren beldurra bada eski-guneetan, klima aldaketaren ertzak jada uki ditzakeelakoan. Segidan, Gouretteko Turismo Bulegoko Zuzendariak, "duela 35 urte jadanik Eguberriz ez genuen elurrik" erantzuten du.

Hala ere, geroztik, estazioek eskia ez den bestelako jarduerak sortu dituzte, elurrik gabe ere, bezeroak erakartzeko. Belarreko trotineta, puzgarriak edota biatloia, hots udako eskaintza antolatu dute, adibidez, Gouretten. Baldintza horietan, Pic du Midik arrakasta izan ohi du eta, aurten, 8.000 bisitari kontatu dituzte. Martxoan elurrik ez denean, Larrungo trenak ere ateratzen ditu etekinak, sasoiaren abiatzearekin.