Aurtengo EHZ festibala Irisarrin ospatuko da

Heldu den ekainaren 28tik 30era iraganen da Euskal Herria Zuzenean festibala Irisarrin. Antolatzaileen erranetan, aurten ziklo berri bati ekin diote, gazte berri ainitz antolaketan sartu eta proiektuari haize berria ekarri diotelako.

Kazeta|26/03/2019 13:55|0 commment
Capture_d_e_cran_2015-09-17_a_17.19.05
Biltzar Nagusia apirilaren 6an iraganen da, Hazparneko Ttattola gaztetxean.

Euskal Herria Zuzenean (EHZ) festibalaren prestaketan udazkenetik ari dira eta lan horren lehen emaitzaren berri eman dute antolatzaileek. Hain zuzen, 2019ko EHZ Irisarrin ospatzea deliberatu dute, ekainaren 28tik 30era bitartean. Jakinarazi dutenez, herriko auzapezaren sostengua jaso dute eta hori bera eskertu nahi izan dute igorritako prentsa oharrean.

Azken urtean laguntzaile berriak batu dira festibalaren antolaketara eta proiektua berritzen entseatzen ari dira. Edozein gisaz, festibalak euskal nortasuna atxikiko du, bai eta izaera herritar eta parte hartzailea ere. Kultura herriaren erdigunera ekartzeaz gain, Ipar Euskal Herriaren barnealdera ere jotzea erabaki dute.

Ondoko asteetarako bi hitzorduren berri eman du EHZ antolatzen ari den taldeak. Batetik, apirilaren 6an Biltzar Nagusia eginen da, goizeko 10:00etatik landa Hazparneko Ttattola gaztetxean. Proiektuan parte hartu nahi duen oro parte hartzera gomitatua da.

Bestetik, bi egun berantago, artistak eta afixa iragartzeko Baionako Pyrenees kafean prentsaurrekoa eginen dute, arratsaldeko 15:00etan.